Ra Lata Poi Daw 3 Laman Hpakant Ginra Hta Mung Masha Marai 5 Hkawt Asak Si Sum Ai Lam

Pajau Media

January 27, 2026

Hpakant ginra hta ra lata poi Daw 3 galaw ai January 25 ya shani kaw nna Myen Hpyen Dap hte KIA lapran lahkawng maga gap gasat ai lam byin ai hta laknak kaba gap ai lam matut manoi galaw ai majaw yawm htum mung masha marai 5 asak si sum ai lam chye lu ai.

January 27 ya jahpawt daw Seng Tawng Lawk 3 kata de laknak kaba wa hkrat kapaw ai majaw marai 3 hkala hkrum ai zawn Nga Pyaw Taw lawk kaw mung laknak kaba wa hkrat ai majaw marai 2 bai hkala hkrum ai re hpe mung chye lu ai.

Dai sha n-ga Myen Hpyen Dap gaw ra lata poi Daw 3 aten ladaw laman ginra shimlam masa a majaw Hpakant muklum na ra lata rung ni mung pat da ai lam chye lu ai. Ya aten Hpakant muklum, Waimaw muklum hte Manmaw ginra hkan shanu nga ai mung masha ni a matu shimlam grai sadi maja ra ai lam shiga ni hta tang madun da ai re.

N dai shata laman hta sha myen hpyen dap gaw hpyen koi yen mung masha ni shanu nga ai shara ni hpe masing nga nga Jet n bungli hte bawm wa jahkrat gap gasat ai lam ni galaw nga ai re.

Dai zawn sha January 22 ya shani hta mung gasat gala majan byin ai lam n nga ai sha Kawng Ja Mare hpe n bungli bawm wa jahkrat bun ai majaw mung masha marai 20 asak si sum nna marai 30 hkawt hkala hkrum ai lam byin lai wa sai re hpe mung chye lu ai.

Shiga- Htu Seng