Myen Hpyen Dap Hpe Mungkan Kawn Garum Madi Shadaw Ai Lam Dan Di Kau Na Matu BWU Kawn Hpyi Shawn Ai Lam

Pajau media

January 27, 2026

Myen Hpyen Dap gaw Mungdan kata ra lata poi galaw nga ai aten raitim maga mi de mung shawa hpe n bungli htim gasat ai lam laja lana galaw nga ai majaw maigan mungdan ni kawn Myen Hpyen Dap hpe madi shadaw garum ai lam dan di kau na matu Burmese Womens Union (BWU) kawn hpyi shawn da ai re hpe chye lu ai.

Myen Hpyen Dap gaw mung masha hpe masat shingte tawn nna n bungli bawm jahkrat htim gasat ai lam dingyang galaw nga ai majaw mara kata mung masha law law asak si sum lam ni byin hkrum nga ai re.

Lai wa sai 2025 laning mi laman hta mung Myen Hpyen Dap a n bungli htim gasat ai majaw amyu shayi marai 792 asak si sum lai wa sai re hte dai kaw na tsa lam shadang 70% gaw n bungli bawm a majaw re lam BWU kawn tsun da ai re.

Ya aten Myen Hpyen Dap gaw ra lata poi aten ladaw raitim htim gasat majan gaw zim ai lam n nga grau grau shaja wa ai re. Jinghpaw Mung Manmaw, Hpakant, Waimaw, Putao , Danai ginra ni de mung matut manoi htu shadut majan baw nga dingyang re hte lai wa sai bat laman hta mung gasat gala majan 22 lang byin ai re lam chye lu ai. Gasat gala majan laman nbungli, drone, laknak kaba ni hkrup mara gap sharu bun ai laja lana galaw ai re hpe mung chye lu ai.

Ntara ai magam bungli galaw nga tim mara lawt nga ai Myen Hpyen Dap hpe maigan mungdan ni kawn garum madi shadaw ai lam, sut hpaga pawng galaw ai lam, laknak arung arai, n bungli sau dut jaw ai lam ni hpe dan di kau lu hkra ASEAN hte mungkan mungdan ni kaw nna tsun garum na matu hpyi shawn da ai re hpe mung chye lu ai.

Shiga- Pyilan U