Mohnyin Ginra Hta Myen Hpyen Dap Lahkawng Ya Matut Manoi N bungli Bawm Wa Jahkrat Ai Lam

Pajau Media

27 January 2026

Jinghpaw Mung Mohnyin ginra kata tsi rung 2 hpe Myen Hpyen Dap kawn lahkawng ya laman n bungli bawm matut manoi gap gasat ai lam chye lu ai.

Lai wa sai January 25 ya hte 26 ya laman Tadar Oo n bungli dap kaw nna lung wa ai Jet Fighter 2 gaw Mohnyin Chyaung Wa tsi rung hte Tung Pin tsi rung hpe n bungli htim gasat ai majaw tsi rung nta ni hten za ai lam chye lu ai.

Dai sha n-ga dai Jet Fighter gaw Hpakant hte Indaw Gyi ginra makau grup yin hkan du hkra matut manoi bawm wa jahkrat gasat ai lam chye lu ai. Ya aten Jinghpaw Mung kata rawt malan hpung uphkang da ai shara hte dap ni hpe mung bai lu la hkra Myen Hpyen Dap gaw lagaw lam htu shadut ai sha n-ga n bungli hku htim gasat ai lam ni matut manoi galaw nga ai re hpe mung chye lu ai.

Myen Hpyen Dap gaw ra lata poi ngut ai hpang Jinghpaw Mung sha n-ga Myen Mungdan ting ngu na de n bungli bawm gap bun ai lam grau garau galaw wa ai majaw mung masha ni hku nna n bungli hpyen hpe grau sadi maja ra ai lam rawt malan hpung ni tsun sadi jaw da ai re hpe mung chye lu ai.

Shiga- Hpring