Drone Bawm A Majaw Mung Masha Marai (5) Hkala Ai Lam

Pajau Media

August 19, 2025

Hpakant ginra hta August 18 ya jahpawt daw hkying 10 Jan daram kaw gasat gala majan n nga ai sha Myen hpyen dap kawn Drone bawm wa jahkrat ai majaw Mung masha marai (5) hkala hkrum ai lam nga ai lam ginra masha ni tsun ai.

“ 7 star Company makau kaw langai wa hkat ai, ဘဇံချောက် shang wa ai kaw mung langai wa hkrat ai ngut na Seng Tawng maga de lahkawng wa hkrat ai Mung masha marai (4) hkala ai” nga nna ginra masha langai tsun ai .

Dai shani hkying 2 Aten daram hta mung Mashi Kahtawng HtungHhpu Lawk kaw mung lak nak kaba wa hkrat kapaw ai majaw Mung masha langai bai hkra hkala ai lam chye lu ai.

“ Mashi kahtawng maga de mung wa hkrat ai, Mashi kahtawng Htung hpu lawk mahkrai makau kaw wa hkrat ai, dai kaw mung amyu shayi langai hkra mat nna Tsi Rung de wa sa da sai” nga nna lahta na mare masha matut tsun dan ai re.

Drone bawm hkra hkala ai ni gaw asak (85) ning re ai Daw Mya Kyi, Asak (48) ning re ai Daw Aye Aye Khai, Asak (15) ning re ai Ma Mye Je Zin, Company Wang kaw nga ai La langai hte Htung Hpu Lawk kaw nna Mying n chye lu ai Mung masha langai re nna, Lata Lahpum, lagaw Magyi, La Hkra lata hte hkum hkrang hkan hkra hkala ai re lam chye lu ai.

Hpakant ginra makau hkan n dai laman hpyen masa grai shaja hkat ai nga dingyang rai nna Myen hpyen dap gaw gasat gala majan n byin ai shara hkan Drone bawm, Lak nak kaba ni gap shadam ai lam, nbungli bawm wa jahkrat ai lam ni matut manoi galaw nga ai re hpe mung chye lu ai.

Shiga – ND