Du Hkra Ladaw A Majaw Putao Ginra Laning Hte Laning Bum Yi Galaw Lu Galaw Sha Yak Wa Ai Lam

Pajau Media

July 26, 2025

Putao Ginra hta Mung masha law malawng gaw lu sha a matu hkauna bum yi ni hpe galaw sha nga ai re hte laning hte laning gaw du hkra ladaw a majaw sha n-ga Nam na hkrung kanu ni a majaw bum yi galaw tim galaw ai daram n lu ai nga nna tsun ai re.

“ Moi kaw na bum yi sha galaw sha rai nna kan bau re, raitim du hkra ladaw a majaw kun laning hte laning gaw grai galaw sha yak wa sai, shawng daw de gaw tinang galaw ai daram lu ai, ya gaw kade galaw ba tim laning mi tup lu sha na pyi tsam mari rai sai, Mam mung laning hte laning pru shadang yawm ai, dai ning mung Yu hpyen tsang ra ai, Yu jahten sai kaw na sha na pyi n gam ai, grai tsang ai dai ning ma ” nga nna bum yi galaw na kanbau nga ai Salang langai Pajau Media de tsun da ai re.

Shawng shaning hkan gaw Mam lap ni hkyeng nna shi hte shi hkraw si ai majaw galaw ai daram n lu ai re. Dai ning kalang bai Yu hte kaga hkrung kanu ni jahten nna Nai Mam n law sha mayak hkrum na hpe myit tsang nga ma ai re. Sumpra Bum ginra kata Mare hkan Nam kaw nna Yu ni du shang wa ai lam ni nga ai majaw dai ni hpe Yu Li hku byin na hpe grai myit tsang nga ma ai re.

Dai ginra masha ni gaw prat ban hte ban bum yi hpe madung tawn nna kan bau nga ai re hte grau nna ginra kata de Jak kaba ni hte Ja htu sha ai lam ni law wa nna lamu ga hten za wa ai hta du hkra ladaw galai shai wa ai majaw galaw lu galaw sha lam ni grai yak wa ai re nga nna mung ginra masha ni tsun ai kaw na chye lu ai.

Putao ginra hta lai wa sai 1990 jan shaning ni hkan mung Yu li hku Kaba hkrum sha nna grai yak hkak lai wa sai re. Yu li hku kumla gaw Nam hkan na Kawa Lap ni run nna Asi si wa yang dai asi ni sha nna Yu ni grai mayat nna Yu li byin wa ai re nga nna Yi galaw sha lai wa sai Salang ni tsun maram nga ma ai re.

Dai ning hkan mung Nam hkan Kawa ni asi grai si wa ai hpe mu lu ai majaw dai ning mung Putao, Sumpra Bum, N Jang Yang ginra ni hte Bum yi galaw sha ai ginra masha ni Yu li hku tsin yam hpe grai myit tsang nga ma ai re hpe mung chye lu ai.

Shiga- Pyilan U