Du Hkra Ladaw Gahtet Shadang Tsaw Wa Ai Hta Wan Sadi Na Matu Myen Mung Wan Sat Dap Kawn Tsun Hpaji Jaw Da Ai Lam

Pajau media

February 24, 2026

Ya aten ginhtawng ta du wa sai hte gahtet shadang mung lani hte lani tsaw nga ai masa hta tinang a dum nta makau grup yin wan hpe sadi maja let jai lang na matu Myen Mung Wan Sat Rung kawn tsun hpaji jaw da ai lam nga ai re hpe mung chye lu ai.

Myen Mungdan hta March kaw nna May shata du hkra du hkra ladaw gahtet shadang gaw tsaw dik madang re hte wan hkru manghkang n byin hkra tinang dum nta makau grup yin hkan sadi maja ra na lam, Wan Tau Nau makawp maga ai lam ni galaw ra ai lam tsun da ai re.

Myen Mungdan kaw byin law ai wan hkru n pawt gaw wan sumri dingsa jai lang ai majaw wire shock kaw nna hkru hpang ai lam, wan n-ga, hpun wan, shana aten wan shadaw jai lang ai hta sadi sahka ai lam gawng kya ai hte gas wan jai lang ai lam ni hpe grai sadi ra na lam, hkun hkraw ta re majaw maza nat ai lam ni hta mung grai sadi maja ra ai lam tsun hpaji jaw da ai re.

Jinghpaw Mung ginra hta n dai laman wan hkru manghkang byin law wa ai hpe mu lu ai re. February 23 ya hta mung Myitkyina Deng (kaw dum nta langai wan hkru mat ai hta dum nta na arung arai hpa mung nlu la, yawng lawm mat ai lam ginra masha ni tsun ai kaw na chye lu ai.

Dai sha n-ga lai wa sai February 13 ya hta mung Jinghpaw Mung Nam Mati Muklum gat makau kaw wan hkru manhgkang byin nna mung masha dum nta 5 wan hkru lawm mat ai lam nga ai hte dai shani hta sha Myitkyina ( အလယ်ကုန်း) lawk kaw mung dum nta (4) wan hkru mat ai mabyin nga lai wa sai lam ginra shiga ni kaw na chye lu ai.

 Ya na zawn wan hkru manghkang byin ai gaw wan hpe hkang zing ai lam hta ningra ai majaw re hte law malawng gaw myihprap wan a majaw hkru hpang wa ai lam law malawng re nga nna Wan Sat Dap kawn tsun da ai re hpe mung chye lu ai.

Shiga – Pyilan U