Myitkyina N Bungli Pa Gap Hkrum Ai mabyin Hpang Myen Hpyen Dap Gaw N Bungli Htim Gasat Ai Lam Grau Galaw Wa Ai Lam

Pajau Media

February 23, 2026

Myen hpyen dap gaw gasat gala majan n nga ai shara hkan du hkra N bungli htim gasat ai lam ni galaw nga ai hta Myitkyina Muklum kaw N bungli bawm jahkrat ai lam hte laknak kaba gap ai n sen ni matut manoi na taw nga ai lam ginra masha ni tsun ai kaw na chye lu ai.

February 22 ya shana hkying 11 min 20 aten daram hta mung KIA Masat 3 Dap Ba N hkawng Pa Mare Pa Kahtawng kaw Myen hpyen dap n bungli bawm wa gap ai majaw mung masha marai 1 asak si sum ai lam chye lu ai.

N bungli bawm gaw Slg N hkum Zau Tawng a dum nta kaw wa hkrat kapaw ai majaw asak 78 ning re ai N hkum Zau Tawng asak si sum mat nna dum nta hten za hkrum ai lam chye lu ai.

February 21 ya hta mung KIA masat 2, Masat 3, Masat 8 hte Masat 9 Dap Ba ni hkan mung Myen hpyen dap kawn gasat gala majan n nga tim N bungli bawm wa gap ai lam, Myitkyina Muklum kaw mung N bungli gap hkrum ai lam nga sai re hpe mung chye lu ai.

KIA masat 2 Dap Ba hte Masat 11 Dap Ba ginra hta mung N bungli bawm 5 lang, Masat (3) Dap Ba ginra Sadung ginra hta mung bawm 2 lang, N Pa Pa mare kaw mung 1 lang, Masat 8 Dap Ba ginra hta Mung 2 lang hte Masat 9 Dap Ba ginra hta mung 4 lang wa gap ai lam chye lu ai.

Myitkyina muklum kaw N bungli pa kaw MNA Nbungli gap hkrum ai mabyin hpang laknak kaba gap ai nsen ni matut manoi na nga ai sha n-ga N bungli mung matut manoi pyen gawai nga dingyang re lam lam ginra masha ni tsun ai kaw na chye lu ai.

Shiga – Htu seng