Hpakant Yu Ma mare makau Myen Hpyen Dap Shara Jahkrat Da Ai Makau Kaw La Marai (2) Gap Sat Hkrum Ai Lam

Pajau Media

February 23, 2026

Ya aten myen hpyen dap gaw Jinghpaw mung kata htim gasat majan ninggam shatsaw galaw nga ai aten mung re hte Hpakant kaw mung masha gap sat hkrum ai lam jahkring hkring byin ai hta Febrary 23 ya jahpawt daw hta mung Hpakant Yu Ma mare makau Myen hpyen dap shara la da ai Dap makau kaw La marai 2 sinat gap ningma hte asak si sum taw ai moi manghkang hpe mu lu ai lam chye lu ai.

Gap sat hkrum ai La lahkawng a moi mang hpe dai hpawt jau mu lu ai rai nna kadai gara kaw na re ngu hpe gaw n chye lu ai lam, moi mang hpe yu yang grai zingri nna gap sat hkrum ai lam ginra masha ni tsun maram da ai kaw na chye lu ai.

Moi mang hpe gaw Sik Mu mare kaw nna shinggyim nau na garum hpung ni kawn wa htaw la mat sai re lam chye lu ai. Lai wa sai February 20 ya shani hta mung asak 30 ning grup yin re ai La langai gaw U Ru Hka makau kaw sinat gap da ai ningma hte asak si taw ai hpe mu lu ai lam chye lu ai.

Hpakant ginra hta January shata htum maga kaw nna gasat gala majan laja nga ai gaw ya aten du hkra re. Gasat gala majan byin ai shata mi laman hta ya na zawn gap sat hkrum ai moi mang (5) mu hta ai lam nga sai re hte laknak lang hpung lahkawng maga shamu shamawt nga ai re majaw kadai gara uhpung ni galaw ai ngu hpe gaw n chye lu ai re hpe mung chye lu ai.

Shiga – Pyilan U