Madang Tsaw Nbungli Hpan Hkum Jai Lang Nna Htim Gasat Ai Lam Ninggam Shatsaw Galaw Nga Ai Lam

Pajau Media

February 24, 2026

Ndai laman Jinghpaw Mung kata Myen Hpyen Dap gaw mung masha ni yawng yup pyaw nga ai yuptung aten hkan sha shading nna n bungli bawm wa jahkrat bun ai lam ni matut manoi galaw nga ai re hpe chye lu ai.

Myen Hpyen Dap kawn shana yup tung aten hkan sha nbungli bawm wa jahkrat ai lam hte seng nna ginra masha langai tsun ai hta “n dai laman shana yup tung hkying 12, hhying 1, hkying 2 laman hkan sha n bungli bawm jahkrat ai, nbungli pyen ai hte bawm jahkrat nsen bai na, shana gaw yup n mai, yawng grai yup pyaw ai aten hkan da sang shading nna gap ai ga rai nga, n dai bat laman gaw shana shagu ngu na daram nan re taw nga” Myitkyina ginra masha langai tsun ai re.

February 24 ya jahpawt daw hkying 1 AM aten daram hta mung Myen hpyen dap Jet Fighter gaw Hpakant Maw Wan ginra Maw Mau Bum mare Koi Tit kaw bawm wa jahkrat bun ai hta mung masha dum nta 5 daram hten za mat ai lam chye lu ai. Maw Mau Bum kaw na Mung masha ni gaw hpyen koi yen taw nga ai re majaw masha hkra hkala ai lam gaw n nga ai re hpe mung chye lu ai.

Grau nna Mung masha nga ai mare kahtawng ni hpe masat tawn nna htim gasat nga ai re hte February 23 ya hta mung Laiza muklum makau Laja Yang, Lai Za hte Manmaw lapran na Myo tit mare, Mai Ja Yang Sa Lam Ta Hkaw Hka mayan, Waimaw Wa Shawng ginra, Chihpwi sa lam hkan nbungli bawm wa jahkrat bun ai lam chye lu ai.

N dai laman gaw KIO uphkang ginra Dap Ba shagu ngu na de nbungli bawm jahkrat ra nga ai hte ntsa hpyen grai sadi maja ra ai lam rawt malan hpung maga na tsun sadi jaw ai lam ni nga ai re hpe mung chye lu ai.

Myen hpyen dap gaw madang tsaw ai nbungli ni Su-30, MIG-29, Yak-130, JF-17, FTC 2000, K-8 ni hpe jai lang nna htim gasat nga ai re hte n dai nbungli hpan ni gaw shingte tawn ai gap masat (တိကျသောပစ်မှတ်) htim gasat ai hta jai lang ai re lam, Y-12 hpe gaw (ဧရိယာအလိုက် ) Area Bombing hku nna jai lang ai re lam chye lu ai.

Dai sha n-ga Mi-35 Helocuptor gaw gap masat hpe ni htep ai hku gap garum ai hta madung jai lang ai re lam hte nbungli ni law malawng gaw Tadar U, Magwi, Meikthila hte Nay Pyi Taw Nbungli Dap kaw nna rawt lung wa ai re lam Myanmar Defense And Security Institute MDSI kaw nna tang madun da ai.

Shiga- Pyilan U