Dum Nta Langai Kaw Na Marai Langai Hpyen Wunkat Lung Ra Ai Sha N-ga Nkung Nbyen Ai Amyu Shayi Du Hkra Hpyen Lahkawn Hkrum Nga Ai Lam

Pajau Media

September 16, 2025

Jinghpaw Mung Indaw Gyi ginra hta dum nta langai kaw na marai langai hpyen wunkat n lung n mai tara jahkrat da ai rai nna, dum nta di di shaga ai re sha n-ga nkung nbyen re amyu shayi ni hpe du hkra wunkat lung shangun ai re lam ginra masha ni tsun ai kaw na chye lu ai.

“ Nam Mun Muklum, Shwe Let Pan mare, Lay Pon mare kaw mung Sam Hkyeng SNA uphkang da ai re, dum nta kaw na langai hpyen wunkat n lung n mai hku na dum nta di di wa shaga la ai, n kau nta hkan gaw langai n-ga ai, nta ting ting lung ra ai, lagaw ntai ai num kasha langai mung atik anang hpyen lahkawn hkrum ai” nga nna Asak 40 ram re ai ginra amyu shayi langai tsun ai.

Ginra masha ni tsun ai hta SNA hpyen wunkat lung ngut sai ni hpe Shawng lam de n sa shangun ai sha tinang dum nta kaw sha nga shangun na re ngu tsun shayaw ai re. Hpyen wunkat koi hkawm ai Mung masha ni hpe mung tinang nta de wa na matu kanu kawa ni shaga la na matu tsun wa ai lam nga ai re hpe chye lu ai.

Indaw Gyi ginra na Ja pru ai shara Mai Nawng hte Mamung Kai hpe lai wa sai July 16 ya shani SNA dap ni jum tek kau ai shata mi na ai hpang ai KIA hte kalang bai gasat gala majan byin ai hta SNA maga na asak si sum law ai re hpe chye lu ai. Dai majaw ya na zawn nkung nbyen ai amyu shayi ni hpe du hkra hpyen lahkawn ai lam grau galaw wa ai re nga nna ginra masha ni tsun maram da ai re.

Asak 18 ning kaw na asak 59 ning lapran ni hpe Bungli dabang, Lam ntsa hte dum nta hkan du hkra atik anang hpyen lahkawn ai lam ni galaw ai re lam chye lu ai. Hpyen wunkat masat yan 1,2 hta Masha marai 200 hte 300 ram sha nga ai hte masat yan (3) hta gaw marai (800) jan du nga sai lam chye lu ai.

 Tsa lam nga ai wunkat lung masha ni hpe dum nta langai kaw na amyu shayi langai shat shadu na matu Nam Mun Gate de sa shangun ai lam chye lu ai. Nam Mun Awng Mye kaw nga ai Hkalup Nawku Jawng Wang kaw SNA Dap ni shara la nna hpyen wunkat jaw nga ai re hte Indaw Gyi ginra shang wa ai madung pru shang shara Nam Mun Muklum hpe SNA hte Myen hpyen dap ni lam pat da ai shata (3) daram na sai re lam chye lu ai.

Shiga - Kachin Pyi Tar