Dumsu Uloi Hpaga Bungli Jarit Pat Da Ai A Majaw Hpaga Lam Yak Nga

Pajau Media

11 March 2025

Jinghpaw mungdaw Manmaw muklum Manwin Gyi ginra, Manje ginra hte Nbapa shara hkan na “Dumsu”, “Uloi” ni hpe jarit pat da ai majaw lagu dut sha ra ai hta sha n-ga tara shang dut na ahkang hkring mat ai shata 3 ram na wa ai a majaw hpaga lam yak wa ai nga nna tsun ai.

“Mi shawng de gaw Nmawk Manje kaw na du ai dumsu uloi ni yawng Nbapa kaw sa dut ai, dai Nbapa kaw na she Miwa hkran na masha ni sa mari ai. Ya gaw jarit ni ma pat da ai majw Miwa kaw na sa mari ai ni mung nnga mat sai. Dai dumsu uloi dut mari ai ni gaw hpaga ga lam hkring mat ai majaw tinang dangdi ai daram dut mari sha ai ni pa nnga wa sai,” nga nna Manje ginra masha langai tsun ai.

Lai wa sai shaning October shata hkan kaw na jarit ni hpe lahkawng maga na lai hkawm ahkang pat kau ai a majaw dumsu uloi hpaga bungli hkring mat ai raitim December shata kawn hpang nna hpaga lam yawng pat mat ai gaw dai ni ten du hkra re.

Ya aten bat mi hta dumsu uloi 10 kawn 15 ram lung wa ai nga ai raitim jarit mayan na shan hkung de sha dut kau ra ai re hte kalang marang Nbapa kaw na Miwa mung de koi lam hku dut mari ai ni mung nga ai hpe chye lu ai.

Hpaga masha nkau mi tsun hta December shata hkan mari da ai dumsu uloi ni ya aten du hkra nlu dut shi ai a majaw arang sum nna hka kap mat ai ni mung law law nga ai nga nna tsun ai.

Shawng de mung masa pyaw ai taw ten hta Manmaw ginra masha law malawng gaw dumsu uloi dut mari ai bungli hte mari na lau ban matut ya ai bungli ni hte dinghku kan bau bungli na matu madung galaw sha nga ai rai tim Covid hpang de dumsu uloi hpaga bungli ni gau ngwi yawm wa ai rai nna lai wa sai shaning December shata kawn jarit pat kau ai a majaw hpaga bungli yawng hkring mat ai lam hpe chye lu ai.

Dai aten hta Nbapa ginra de dumsu uloi hpaga ga ai masha ni lani mi hta dumsu hkying hku, yawm htum gaw tsa hku dut mari hpaga ga lai wa ai re hpe mung matut chye lu ai.

Shiga – Zau Mai