Dung (6) Ginra De Nbungli Bawm Wa Jahkrat Bun Ai Lam

Pajau Media

October 21, 2025

KIA masat (9) Dap Ba Dung (6) Hpakant ginra hpe Myen hpyen dap kawn October 21 ya jahpawt hkying 7 aten daram hta Nbungli bawm (40) lang daram wa jahkrat bun ai lam ginra masha ni kaw na chye lu ai.

Dung (6) ginra Ginsi maga de Y-12 Nbungli bawm hte wa gap bun ai rai nna dai bawm ni gaw masha n nga ai Nam kaw wa hkrat ai majaw ya aten du hkra gaw masha hkra hkala ai lam n nga ai hpe chye lu ai. Nbungli bawm (40) lang daram wa jahkrat ai re majaw kata lam masa hpe matut naw sagawn nga ai majaw shiga mabyin tup hkrak nchye lu shi ai re.

Myen hpyen dap gaw Hpakant ginra hpe Nbungli, Laknak kaba htim gasat ai lam jahkring hkring galaw ai hta Mung masha asak si sum hkala hkrum ai lam ni nga ai re. Dai zawn sha Yu Ma mare Mashi Kahtawng mare makau de mung lai wa sai October 20 ya shani Myen hpyen dap, Sam Hkyeng P.T.Ts pawng hpawm hpung ni htu shadut htim gasat ai majaw KIA pawng hpawm hpung lapran gasat gala majan byin ai re lam chye lu ai.

Gasat gala majan hta Myen hpyen dap gaw Tatma Kawng kaw nna Laknak kaba gap garum nna Yu Ma mare maga de Laknak kaba wa hkrat kapaw ai hta masha hkra hkala asak si sum ai lam chye lu ai. Jinghpaw Mung Manmaw Waimaw Hpyen man ni hta mung gasat gala majan matut manoi byin nga dingyang re.

Shiga- Htu Seng