Gasat Gala A Majaw Myitkyina Shwe Bu Mawdaw Hkrun Lam Hpe Aten N Masat Pat Da Ai Lam

Pajau Media

February 6, 2026

Myitkyina Shwe Bu hkawm sa hkrun lam kaw nga ai Chyauk Tan mare kaw gasat gala majan byin ai majaw Myen Hpyen Dap gaw Shawe Bu shagyit hpe aten n masat pat kau ai lam mawdaw sara ni kaw na chye lu ai.

Myen Hpyen Dap gaw Myitkyina Shwe Bu lam shagyit hpe pat da ai zawn, lung wa ai mawdaw ni hpe mung pat ai lam, yu wa ai ni hpe gaw shalai ai majaw hkrun lam hta aten grai na ai lam chye lu ai.

“Yu wa ai nga yang mai ai, lung wa ai ni hpe gaw tsep kawp n shalai ai,” nga nna mawdaw la langai tsun ai re.

Dai sha n-ga Myitkyina Mandalay byuha lam kaw mung gasat gala majan byin ai majaw mawdaw hte hkrun lam hkawm masha ni hkala hkrum ai lam nga ai re hpe mung chye lu ai.

Lai wa sai December shata kaw nna Myitkyina Mandalay byuha lam hpe Myen Hpyen Dap wa dung ai hpang lahkawng maga gasat gala majan jahkring hkring byin nna lam pat ai majaw gunrai htaw mawdaw, hkrun lam hkawm mawdaw tsa lam chyat nga ai re hte lawm wa ai gunrai ni mung hten yat mat ai lam ni byin hkrum nga ai re hpe chye lu ai.

Shiga: Hpring