Putao Lung Sha Yang Mare Kaw Myen Hpyen Dap Starlink Zing Kau Ai Hpang Matut Mahkai Lam Grai Yak Ai Lam Mung Masha Ni Tsun Ai Lam

Pajau media

February 6, 2026

Myen Hpyen Dap gaw Putao Lung Sha Yang mare kaw na Starlink Wifi ni zing kau ya ai hpang kaw nna mare kaw Wifi n lu mat ai majaw matut mahkai lam grai yak mat ai lam ginra masha ni tsun ai kaw na chye lu ai.

Putao ginra hta Myen Hpyen Dap gaw Starlink wifi jak ni hkan zing ai lam galaw ai hpang n kau gaw gumhpraw hte bai lu shaw la ai lam nga ai raitim Lung Sha Yang mare kaw na gaw zing la ai kaw nna gumhpraw hte mung n mai shaw la mat ai lam, phone line mung nlu ai majaw sumtsan de nga ai kashu kasha ni, jinghku ni hte matut mahkai lam n lu ai majaw grai yak hkak nga ai lam ginra masha langai tsun ai re.

“Lung Sha Yang kaw Myen Hpyen Dap Up wa gap sat hkrum ai hpang kaw nna Lung Sha Yang kaw na Wifi ni zing kau ai re, dai majaw shada matut mahkai grai yak mat sai, starlink nga yang gaw maigan kaw nga ai kashu kasha ni hte mung mai matut mahkai rai nga, phone line gaw n kaja ai hte nsin chyip re mat ai ga rai nga” nga nna Lung Sha Yang ginra masha tsun ai re.

Lung sha Yang Dap Up (စခန်းမှုး) sat hkrum ai mabyin gaw lai wa sai Januray shata laman byin ai re hte ginra masha ni tsun ai hta shada gyam sat hkat ai masa re lam tsun maram nga ma ai re. Dai mabyin hpang ya na zawn Starlink jak ni zing kau ai gaw ya aten du hkra line n lu ai re lam chye lu ai.

Ya aten mung masa gaw lani hte lani grau grau sawng wa ai majaw matut mahkai n nga mat ai hta ginra masha ni a matu grai yak hkak dut dang ai lam, Putao ginra kata hta Lung Sha Yang mare hta lai nna kaga mare kahtawng hkan gaw Wifi lu ai hpe mung chye lu ai.

Ya aten Myen Hpyen Dap gaw n-gun jat shamu shamawt hkawm ai lam nga ai re hte lung Sha Yang makau Tan Ja mayan de gaw hpyen masa shaja hkat re majaw sadi maja let nga ra ai masa re lam chye lu ai.

Shiga- Pyilan U