Gasat Gala Byin Ai Kahta Ginra Mung Masha Ni Hpe Myen Hpyen Dap Kawn Hprawng Pru na Ahkang Pat Da Ai Lam

Pajau Media

30 December 2025

Myen hpyen dap gaw n dai laman ra lata poi galaw kyin nga ai raitim maga mi de gasat gala majan mung grau shaja wa ai rai nna gasat gala majan byin ai ginra na mung masha ni hpe hprawng yen ahkang njaw ai lam chye lu ai.

Jinghpaw mung Sagaing Jarit Kahta Ginra hta mung December 26 ya daram kaw nna PDF ni hte Myen Hpyen Dap lapran gasat gala majan laja wa ai gaw ya aten du hkra re hte ginra masha ni hpe hprawng pru ahkang mung n jaw rai nna ginra masha ni yak hkak nga ma ai lam chye lu ai.

Gasat gala majan gaw muklum shinggan maga kaw nna hpang ai rai nna laknak kaba n sen ni matut manoi na wa ai majaw ginra masha ni gaw hkrit tsang nna hprawng yen hkyen ai hpe hprawng pru ahkang n jaw ai re lam chye lu ai.

Majan byin ai shara ni gaw Kahta Lawk 5, Lawk 8 hte Hk.M.Y 309 makau mayan re hte Y-12 n bungli hpan ni grai pyen gawai nga ai lam, ginra masha ni hkrit tsang nna hprawng yen mayu tim ahkang n lu ai majaw Nawku Jawng, Hpunggyi Jawng hkan sha koi yen nga ma ai lam chye lu ai.

Gasat gala majan naw laja nga ai hte dum n ta wan hkru ai lam ni byin nga ai lam chye lu ai. Kahta Muklum kaw 2014 yup tung jahpan hku nga yang mung masha 26,000 ja shanu nga ai ginra re lam chye lu ai.

Gasat gala majan grau laja wa mai ai majaw rawt malan hpung ni gaw mung masha ni lawan hprawng yen na matu tsun sadi jaw tim Myen hpyen Dap kawn hprawng yen ahkang pat da ai majaw grai yak hkak nga ma ai re hpe chye lu ai.

Shiga - Pyilan U