Gasat Gala Byin Ai Lam N Nga Ai Sha Waimaw Ginra De Myen Hpyen Dap N Bungli Bawm Jahkrat Bun Ai Lam

Pajau Media

June 24.2025

Jinghpaw Mung Waimaw ginra hta n dai laman Myen hpyen dap gaw ga lam hku htu shadut nga ai hte N bungli bawm jahkrat bun ai lam, lak nak kaba gap ai lam jahkring hkring galaw nna ya aten hpyen masa shaja hkat nga ai masa re .

Waimaw, Wa Shawng mare makau Gwi Rut Yang mare kaw mung June 23 ya shana hta Myen hpyen dap n bungli bawm wa jahkrat ai lam nga ai re hpe chye lu ai. N bungli bawm wa jahkrat ai majaw mung masha dum nta hten za ai mat ai hte mung masha marai (2) hkala ai lam chye lu ai raitim matut mahkai yak ai majaw n lu shagrin shi ai re.

Dai sha n-ga June 22 ya shana hkying (10:00) PM aten daram hta mung Lamyang mare hte Wa Shawng mare makau mayan hta gasat gala byin ai lam n nga ai sha Myitkyina kaw na lung wa ai Myen hpyen dap n bungli kawn bawm wa jahkrat bun ai lam nga ai re hpe mung chye lu ai.

June 22 ya shani hta mung Hpakant ginra kata Hpakant Tat Ma Kung kaw dap jung nga ai Myen hpyen dap hpung ni gaw gasat gala byin ai lam n nga ai sha laknak kaba hkrup mara gap bang nga ai re hpe mung chye lu ai.

Myen hpyen dap gaw n dai laman Hpakant ginra sha n-ga Waimaw ginra ni de ga lam hku htu shadut ai lam matut manoi galaw nga ai hte lak nak kaba gap ai lam, nbungli bawm jahkrat bun ai lam ni galaw ai majaw mung masha hte dum nta hten za ai lam dingyang byin nga ai re.

Ginra masha ni tsun ai hta Waimaw Maina hpyen yen dabang makau kaw na Ding Gri Hka kaw mung dap shara jung wa nna lai wa lai sa ni hpe hkap jahkring gumhpraw hta ai lam ni galaw nga ai re hpe mung chye lu ai.

Shiga – Htu Seng