Gasat Gala Majan A Majaw Pat Da Ai Myitkyina -Hpakant (Nam Ya) Lam Lung Wa Ai Lam Bai Hpaw Sai

Pajau Media Channel

16th April, 2024

Myitkyina-Hpakant hkrun lam Nam Ya mare lam hpe gasat gala majan byin ai April 9 ya kaw nna aten n masat hkawm sa hkrun lam pat kau ra ai re hte April 16 ya shani kaw nna hkawm sa hkrun lam bai hpaw ya sai lam ginra masha ni tsun ai .

Lai wa sai April (9) ya kaw nna Nam Ya myen hpyen dap HK.M.Y (120) dap hpe wunpawng mungdan shanglawt hpyen dap KIA kawn htu shadut htim gasat wa ai hpang majan laja wa ai hte April (11) ya jahpawt daw hta gaw atsai awai zing madu la lu sai re. Ya aten dai ginra mayan hpe wunpawng mungdan shanglawt hpyen dap kawn ginra jasan masing ni matut manoi bungli shang ai majaw hkrun lam hpe bat lahkawng daram pat da ai hpang bai hpaw ya ai re hpe mung chye lu ai.

Ya aten Jinghpaw Mungdaw ginra shara shagu hta gasat gala majan gaw matut manoi byin nga ai re hte ya aten Sumprabum ginra mayan hta mung gasat gala majan a majaw hkawm sa hkrun lam pat da ai shata mi jan daram na wa sai re hpe mung chye lu ai.