Gasat Gala Majan Byin Ai Putao Sinpraw Hkran Ginra Hta Hkrun Lam Ni Pat Da Ai Lam

Pajau Media

October 14, 2025

Myen hpyen dap gaw ya aten Jinghpaw Mung shara shagu de hpyen n-gun jat htu shadut wa ai hta Putao sinpraw hkran Htang Ga ginra de mung gasat gala majan byin ai majaw hkawm sa hkrun lam pat da ai re lam chye lu ai.

 “ Ya hte October 12 ya kaw na Htang Ga lai hte kaw majan byin ai, shara shagu de Hpyen shamu sai ga re, dai majaw lam pat da sai, ya n kau gaw Bum Yi Mam Mu ngut sai ni nga ai, tim Yu grai sha ai majaw nau nlu ai, N-gu ni mung htaw sha wa ra, n kau gaw Chyingma tam sa na ni mung nga, ya gaw lam pat ai majaw yawng chyat taw ai masa re” nga nna ginra masha langai tsun ai re.

Lai wa sai aten hkan gaw dai ginra de majan byin ai lam gaw n nga ai re, raitim Myen hpyen dap gaw Jingpaw Mung shara shagu de hpyen n-gun jat shamu wa ai majaw ya na zawn gasat gala ni byin nna hkawm sa hkawm wa lam ni pat ai majaw ginra masha ni grai yak wa ai lam matut tsun ai re.

“ Htang Ga mare kaw na n lai shangun sai, Htang Ga mare masha ni hpe Yi pyi nsa shangun ai da, aten na na re yang grau yak sai, hkawm sa na matu dai lam langai sha nga ai re, Shau Gaw sun galaw ai mung dai lam, ya gaw gara de na ni mung n mai shamu taw ai masa re taw ai” nga nna tsun ai.

Dai ginra hta ya aten Myen hpyen dap hte P.T.Ts pawng hpaw hpung ni shamu shamawt nga ai re hte Htang Ga mare lai hta Hka Rum makau kaw Ang katut gasat gala byin ai re hpe chye lu ai.

Sinpraw hkran ginra masha ni a matu Htang Ga lam gaw Machyang Baw Muklum, Putao Muklumde hkawm sa ai lam madung rai nna Ma ni Jawng Lung sa lam, dai ginra masha ni N-gu malu masha, Jum, Sau, Shakau ni htaw na mung dai lam hku sha hkawm sa ai re majaw ya na zawn lam pat mat yang dai ginra masha ni a matu grai yak hkak wa mai ai lam re hpe mung chye lu ai.

Putao Sinpraw hkran ginra hta Dinghkyet, Ding Ga, Marawt mare, Ma Pyung mare, Dingsa mare ni nga ai rai nna Shau Gaw Sun galaw lu galaw sha shara lam madung re hpe mung chye lu ai.

Shiga- Pyilan U