Gasat Gala Majan Laja Nga Ai Hpakant Ginra Kata Ginra Pat Ja San Hpung Ni Kawn Bungli Matut Manoi Shang Nga Ai Lam

Pajau Media

October 13, 2025

Hpakant ginra kata Shanglawt Asuya Ka-ni nanghpam PJS bungli masing kata ginra daju PJS hpung ni pawng hpawm nna PJS bungli matut manoi shang ai hta Ka-ni lu sha dut hpaga galaw masha ni, Ka-ni lu lang arung arai ni hpe rim zing la lu ai lam KIA shiga kaw na chye lu ai.

Hpakant ginra kata lai wa sai June, July, August shata laman gasat gala hpyen masa laja ai majaw PJS bungli shang ai lam hpe gan jahkring da ra ai raitim September shata kaw nna bungli matut manoi shang ai hta shata mi laman Ka-ni lu sha jai lang, dut hpaga galaw ai masha marai 16, Ya Ma Tawng 1624, Ya Ma htuk 250, Ka-ni Hpraw Pipe kaba 27, Pipe kaji 28 , Ka-ni Chyang Htuk 5 hte hpawn Phone, cycle, gumhpraw ni hpe lu rim ai rai nna seng ang ai de ap kau sai lam chye lu ai.

KIO asuya kawn tsun ai hta Ka-ni nanghpam gaw amyu sha yawng a hpyen madung re majaw pat ja san ai lam galaw nga ai re hte ya aten Jinghpaw Mung kata htim gasat zing madu da lu sai lam ginra hkan mung PJS bungli shang nna Dawn jasan ai magam bungli ni hpe mung galaw ya nga ai re hpe mung chye lu ai.

Miwa jarit Kanpaiti, Chihpwi, Bang Wa Ginra de mung lai wa sai aten Jarit sin hpung ni uphkang ai aten ladaw hta Ka-ni Sun hpe madung kanbau bungli hku galaw sha nga wa ai hta Shanglawt Asuya htim gasat zing madu la lu ai hpang kaw nna ya aten du hkra Ginra kata Ka-ni nanghpam PJS ai lam mung matut manoi galaw nga ai lam chye lu ai. Dai ginra hta PJS bungli hpe ningmu jahpaw hkaw tsun ai ladat hku nna matut manoi bungli shang nga dingyang re lam chye lu ai.

Shiga – Pyilan U