Gasat Gala Majan Laja Nga Ai Majaw Hpakant Ginra Masha Ni Myitkyina De Hpyen Koi Yen Ai Lam Law Wa

Pajau Media

September 24.2025

Myen hpyen dap gaw Hpakant ginra de shani shagu hpyen htu shadut htim gasat ai sha n-ga Laknak kaba shani shagu gap bang ai majaw ginra masha ni Myitkyina ginra de hpyen koi yen ai masha ni law wa ai re hpe chye lu ai.

Hkrit tsang ra ai masa hta Hpakant ginra masha ni gaw Myitkyina de koi yen ai ni nga ai zawn n kau gaw gaduk htu nna ginra kata kaw sha shanu nga nna n kau gaw Hkum lawt daw tinang na ladat hte koi yen nga ai hpe chye lu ai.

Hpakant Mashi Kahtawng kaw na law malawng gaw Shatapru buga kaw wa shanu ai lam shatapru buga magam gun sara langai tsun ai.

 " Majan gaw shara shagu laja wa yawng gaw yak ai hkrai rai nga, Shatapru kaw hpyen yen n tawn sai ngu hpyen yen dabang pyi dawm kau na matsing re, raitim majan a majaw bai yen wa ai ni nga ai majaw shara bai jaw na hkap la lakawn nga ai, Hpakant Mashi Kahtawng, Sharaw Hka hkan na Hpung masha ni re. Lai wa sai Auguat Praw 7 ya kaw na du shang hpang sai, Ya september 22 du hkra shang wa dingyang re" nga nna tsun ai re.

Ya aten hpyen koi yen ra mat ai ni gaw Hpakant Seng Tawng ginra kata na Mashi Kahtawng Mare, Sharaw Hka, Maw Tawng, San Chyoi, Maw Maw Layang, Maw Wan Kaba, Maw wan Kaji hte Hpakant Muklum hkan na Mung masha ni re hpe chye lu ai.

Nkau gaw Nawku hpung ni woi awn ai kata koi yen hkawm ai ni lawm ai zawn n kau gaw tinang na mahkrun hte tinang koi yen wa ai ni lawm ai majaw hpyen koi yen Mung masha ni hpe lam shagu hta garum madi shadaw la na matu mung hpyi shawn nga ma ai re.

Hpakant ginra majan laja hpang wa ai April May kaw nna hprawng yen ai Mung masha 2,000 kaw na 3,000 lapran nga ai lam chye lu ai. August hpang daw de koi yen ai masha gaw grau grau law wa ai majaw jahpan tup hkrak lu na matu yak hkak nga ai re.

Hpakant ginra gasat gala majan hta August shata hpang daw kaw nna myen hpyen dap gaw Ka Mai, Nam Ya Hpakant lam hte Lawng Hkang ginra kata mare kahtawng n kau hpe uphkang lu wa nna Hpakant Seng Tawng Sik Mu maga de bai htu shadut ai gaw ya aten du hkra re lam chye lu ai.

 Dai sha n-ga gasat gala majan n nga tim Hpakant Tat Ma Kawng kaw nna laknak kaba shani shana Gap shadam ai majaw Mung masha si hkala hkrum ai lam law wa ai re hpe chye lu ai.

September 23 ya shani hta mung Myen hpyen dap gap dat ai Drone Bawm a majaw Seng Tawng Chyauk Thwe Tawng kaw wa hkrat nna Kawa hte Kasha lahkawng yen kalang ta asak si sum ai lam byin lai wa sai re.

Myen hpyen dap gaw n dai laman masha law nna ahkyak ai Lawng Hkang, Seng Tawng, Hpakant Muklum shara ni hpe zing madu lu hkra ngu ai masing hte laja lana htu shadut nga ai sha n-ga Drone, Laknak kaba ni gap shadam nga dingyang re hpe chye lu ai.

Shiga - Pyilan U