Gasat Gala Majan Naw Laja Nga Ai Majaw Manmaw Hkrun Lam Pat Nga Dingyang Rai Nga Ai Lam

Pajau Media Channel

17th May, 2024

Manmaw Ginra de May 7 ya daram kaw nna gasat gala majan grai laja wa ai hpang hkawm sa hkrun lam ni hpe Myen Hpyen Dap kawn pat tawn da ai gaw ya aten du hkra pat nga dingyang re lam ginra masha ni tsun ai kaw na chye lu ai.

“ya shanhte gaw Lam maw kaba ni hku lai hkawm ahkang pat da ai re, nam lam hku nna hkawm sa ahkang jaw da ai re, raitim n dai lapran gasat gala majan mung laja nga dingyang re majaw kadai mung n gwi lit la ai, tsun mayu ai gaw hpyen ninggang shatai na masa hku tsun ai lam re” nga nna Manmaw maga kaw nna koi yen wa ai mung masha langai tsun ai re.

KIA pawng hpawm hpyen hpung ni gaw Myitkyina Manmaw lam mayan de may praw 7 ya kaw nna htu shadut htim gasat hpang wa ai re hte gasat gala byin ai makau mayan hkan na mung masha ni yawng Manmaw muklum kata de hprawng koi yen nga mat ai re, ya aten Nmawk hte Manje ginra hta gaw gasat gala majan laja nga dingyang re hte muklum pru shang hkrun lam ni hpe mung pat da ai re hpe chye lu ai.

Gasat gala majan a majaw hkrun lam pat tawn da ai sha n-ga matut mahkai lam MPT, Atom hte Ooredoo Ph line ni mung yawng pat kau ai sha n-ga Myen Hpyen Dap lak nak kaba, n bungli bawm ni hkrup mara gap sharu bun ai majaw mung masha dum nta wan hkru ai lam ni nga ai.

n dai laman hta sha n bungli bawm, lak nak kaba ni a majaw Manje ginra hta mung masha dum nta 20 hkawt wan hkru, hten za hkrum ai lam ni byin nga ai re hpe mung chye lu ai. Manmaw ginra hta ya aten Mytel simcard hte Mytel wifi ni sha mai jai lang nga ai re hte ngam ai phone line pat kau ai masum ya daram rai wa sai lam ginra masha ni tsun ai kaw na chye lu ai.