Gasat Gala Majan Nnga Tim Hopin Ginra Na Myen Hpyen Dap Ni Gaw Sanat Kaba Gap Shadam Ai Majaw Mung Masha Ni Hkrit Tsang Nga

Pajau Media Channel

4th April, 2024

Mohnyin ginra hta n dai laman gasat gala majan n nga ai raitim Hopin Myen hpyen dap, dap dung (40) kawn April (1) ya kaw nna shani shagu ngu na daram sanat kaba hkrup mara gap shadam ai majaw mung masha ni grai hkrit tsang let mare kaw kadai n gwi nga hprawng yen nga ma ai lam chye lu ai.

Ya na zawn Myen Hpyen Dap kawn lak nak kaba hkrup mara gap shadam ai majaw mung masha si hkala hkrum ai lam ni mung lang hte lang rai nga sai hte April praw (1) ya shani hta mung jahpawt maga kaw nna Nam Yin Hka maga de lak nak kaba shani shagu ngu na daram gap nga ai hte hpyen nbungli ni mung dingyang na pyen gawai ai majaw mung masha ni mare kaw n gwi nga ai lam tsun ai.

Ya aten na dai ginra masa hta hkan nna mung masha langai tsun ai hta “Gasat gala majan n nga ai raitim lak nak kaba shani shagu gap shangoi ai. Shahte gap ai lak nak si a majaw mung masha si hkala hkrum ai lam law law nga ai. Dai majaw sanat kaba n sen na ai hte mare masha ni gaw hprawng yen na sha chye mat sai. Myen hpyen dap a lak nak kaba si gaw hkau na hkan wa hkrat ai lam nga ai. Kadai mung bungli n gwi sa galaw ai madang byin nga sai” nga tsun ai re.

Lai wa sai March shata hta mung dap dung (40) kawn gap dat ai lak nak kaba si a majaw hkau na kaw na wa ai Nam Yin mung masha lahkawng kaw wa hkra nna marai (1) asak si sum mat ai hte marai (1) hkala sawng ai lam byin lai wa sai lam mung masha matut tsun dan ai re. “Dap Dung (4) kaw na gap ai lak nak sha re. March (3) ya daram hta re. Hkau na kaw na wa ai hkan la kaw hkra ai. Salang wa gaw dai kaw nan kalang ta asak si sum mat ai, madu jan gaw hkala sawng ai. Masum ning re ai ma mung naw lawm ai. Ma gaw hpa n byin na tsamai ai. Moi mang wa hta ai shaloi mung sanat kaba gap dingyang re majaw moi mang hta la pyi grai yak hkak ai re. Makoi mayang lamang hta masha pyi n nga ai. Sanat kaba hkrit na mare ting hprawng yen mat ai” nga lam Nam Yin ginra masha tsun ai re.

Myen hpyen dap gaw April praw kaw nna aten ntam sanat gap shadam ai lam shani shagu ngu na daram galaw wa ai majaw dai ginra masha ni galaw lu galaw sha hkawm sa lam ni hta grai yak hkak wa ai re hte aten hpring maja nna sha nga ra ai re lam chye lu ai. Myen hpyen dap kawn Nam Yin mahkrai makau mayan hta shara la nga ai majaw mung masha ni lai na matu pyi yak hkak nga ai masa re lam ginra masha ni tsun shana wa ai.

Shiga - Kachin Pyi Tar