Gunrai Manu Grau Tsaw Jat Ai Majaw Putao Ginra Masha Ni Grai Yak Hkak Nga Ma Ai Lam

Pajau Media

November 20.2025

Putao ginra kata gat lawk ni hkan gunrai manu ni gaw lani hte lani grau grau tsaw jat nga ai hta ginra kata shingra lu sha ni gaw manu n lu ai majaw ginra masha ni grai yak hkak nga ma ai lam chye lu ai.

Putao ginra hta n shung ladaw hta madung shingra hpaga gunrai langai rai nga ai Grape Fruit Nam Si manu ni gaw ladu lai hkrat yawm nga ai lam, Hkauna Mam manu ni mung manu grai n lu mat ai nga nna ginra masha ni tsun ai.

" Dai ning gaw Putao ginra kata law malawng a matu grai yak ai shaning she re, maning gaw Mam Bye 8 re ai Pung mi kaw Mun lahkawng jan du hkra lu ai, dai ning gaw Mun mi Jan pyi kadai n kam jaw, ndai aten gaw Grape Fruit si dut shata re majaw shaw dut sha ga ngu yang langai kaw Latsa Manga shi bai nga, Lai wa sai 6/7 ning hkan pyi langai kaw Masum Mali Tsa lu ai wa, ya gaw Gumhpraw manu mung n nga, shingra dut hpaga ni hpa manu n lu mat sai" nga nna tsun ai re.

Gat Lawk kaw gunrai ni mung hkrun lam masa hta hkan nna tsaw she tsaw nga ai lam, Jak Sau manu mung 1 liter kaw Mun mi lahta kaw na hkrat yawm ai lam n nga ai majaw grai yak ai lam chye lu ai.

Putao Ginra hta shingra dut hpaga gunrai ngu ai hta manu dan ai Ja rai hte Nam hkan na lu la ai gunrai ni hta lai nna hkai lu hkai sha ai Namsi Nam Saw manu ni gaw ladu lai hkrat yawm ai lam, Mung masa shuk shanut ai majaw gunrai htaw shalai ai lam hta dut dang shangun ai sha n-ga Myitkyina Putao mawdaw lam n tsa shagyit law ai hte gumhpraw hta ai shara ni law ai majaw shingra lu sha gunrai ni dut hpaga lam grai hkrat yawm ai re hpe mung chye lu ai.

Shiga - Mali Hku