Gwi Hka Lung Seng Tam Bungli Galaw Sha Ahkaw Ahkang Wang Lu Wang Lang Galaw Lu Na Lam Hte Seng Nna Hpyi Shawn Ai Lam

Pajau Media Channel

28th April, 2024

Hpakant Gwi Hka Ginra hta tinang dang di dang dep ai hku tam lu tam sha nga ai Mung masha ni wang lu wang lang galaw sha ahkang lu na matu April 27 ya shani hpyi shawn ai lamang galaw ai re hpe chye lu ai.

Lamang hta shang lawm ai ni tsun ai hta Gwi Hka ginra hpe uphkang nga ai lak nak lang uhpung uhpawng ni gaw lung seng htu shaw ai lam hte seng nna hkum pat da ai masum ning daram na wa sai re majaw dang di dang dep ai masa hku galaw sha nga ai ginra mung masha ni shara n lu yak hkak ai lam law law re, ginra madu ni mung wang lu wang lang galaw sha ahkang lu na matu ya na zawn hpyi shawn wa ai re lam chye lu ai.

"2021 shaning htum wa maga kaw nna lung seng htu shaw ahkang pat kau ai re hte Dai ni tam dai ni sha bungli galaw sha ai anhte a matu galaw sha shara n lu ai, gwi hka kaw moi kaw nna nga ai ginra masha re majaw n ta masha ni hte re n dai kaw lung seng htu ahkang pat da ai re majaw Hpakant de du hkra sa nna lung seng wa tam ra ai, grai dut dang ai lam byin shangun ai" nga nna mayak hpe ginra masha tsun dan ai re.

Hpakant ginra de mung n dai hpang daw de lung seng tam bungli galaw ahkang lu na matu grai yak wa ai, ginra masha ni gaw lung seng bungli hpe sha machyu nna kan bau ai re majaw bungli galaw shara yak hkak wa yang gaw lam shagu grai yak wa ai masa re nga nna tsun ai. Gwi hka kaw lung seng bungli galaw ahkang pat da ai nga tim ahkaw ahkang lu ai uhpung ni hte ni htep ai lau ban lau na ni gaw dingyang na bungli galaw ahkang lu ai re lam ginra masha ni tsun ai kaw na chye lu ai.

Shiga - Kachin Pyi Tar