Hka Hpyen A Majaw Jarit Mayan Hta Mung Masha Marai 6 Asak Si Sum Nna Marai 5,000 Hkawt Hka Hpyen Hkrum Sha Nga

Pajau Media

August 6, 2025

KIO Uphkang Ginra kata Hka kaba tsin yam hta Mung masha marai 6 asak si sum nna marai 5,000 daram Hka Hpyen tsin yam hkrum sha ai lam chye lu ai.

August 4 ya Jahpawt daw hta marang ladu lai htu sawng nna Je Yang Hka kaba wa ai majaw Sut Mu Awng, Hpun Lum Yang, Je Yang, Ja Htu Kawng , Mung Seng Yang hpyen Yen Dabang hkan Hka Hpyen tsin yam hkrum ai rai nna ya aten hka hpyen hkrum ai ni Nawku Jawng hkan hte kaga shimlum ai shara hkan koi yen nga ai re.

Hka Hpyen tsin yam a majaw Mung masha Marai 6 Asak si sum nna dum n ta 460 hte Mahkrai 7 daram hten za mat ai lam, hkrun lam shara 6 daram mung hten za mat ai majaw hkawm sa grai yak hkak nga ai re hpe chye lu ai.

Kalang ta Bum Hka Tung kaba wa ai majaw Mung masha Dum n ta, Nawku Jawng ni, Ma shalet jawng ni hten za mat ai re.

Hka kaba ai majaw Wan shadaw ni mung hten ai majaw ya aten Laiza Ginra mayan hte Jarit mayan ginra hta myi hprap wan n lu ai re hpe chye lu ai.

Hten za ai Hkrun lam Mahkrai, Myi Hprap Wan ni hpe seng ang ai ni kaw nna lit la gram sharai nga ai re hpe chye lu ai.

Shiga-Hpring