Hka Hpyen Tsin Yam Hkrum Ai Hpyen Yen Dabang Ni Hta Lu Lang Hka Hkyak Hkyak Ra Kadawn Nga Ai Lam

Pajau Media

August 14,2025

Hka hpyen lahkawng lang byin hkrum ai ginjaw ginra kata na hpyen yen dabang ni hta ya aten hkye mawoi magam bungli matut manoi shang nga dingyang re hte ya aten Je Yang hpyen yen dabang hta lu lang hka hkyak hkyak ra kadawn nga ai lam chye lu ai.

Lai wa sai August 4 ya jahpawt jau byin ai Hka hpyen tsin yam gaw sawng dik madang hku hkrum sha ai re hte hka maw ru a majaw dabang kata len la ai hka pipe ni yawng daw hten mat ai sha n-ga Hka la ai n pawt hkan ga gyi kaput mat ai majaw n nan kaw nna bai galaw la ra sai re.

Ya aten hpyen yen dabang ni hta hkyak hkak gaw lu lang hka grai ra kadawn nga ai lam Je Yang hpyen yen dabang lit hkam tsun da ai kaw na chye lu ai. Ya aten dabang kata Mung masha grai naw law ai re majaw seng ang ai KIO Asuya Hka hpyen hkye mawoi komiti ni de lawan tang madun ai hte dabang kata hka lu lang hkra galaw na matu shakut nga dingyang re hpe mung chye lu ai.

Hka hpyen tsin yam a majaw Hpyen yen Mung masha ni a shat gawk arung arai sha n-ga Bu hpun n ba du hkra hka hta yawng lawm mat ai re majaw ya aten garum ningtum lam ni gaw grai hkyak nga ai re hpe mung chye lu ai.

Hka kaba ai laman Wan shadaw ni mung daw mat nna Laiza ginra hta Myi hprap wan nlu ai gaw lai wa sai August 4 ya hpang kaw nna rai sai re hte Myi hprap wan rung kaw nna gram lajang ai lam ni galaw ai hta shata mi daram na na re lam n dau da ai re hpe mung chye lu ai.

Shiga- Pyilan U