Hka Lam Shading Ya Let Hka Madim Galaw Ya Na Nga nna Putao Makat Mung Mare Mali Hka Mayan Hta Myen Hpyen Dap Ja Htu Ai Lam Galaw Nga

Pajau Media Channel

16th April, 2024

Putao Makat Mung ginra masha ni nan makawp maga da ai Mali hka mayan hta myen hpyen dap HK.L.Y 46 Dap up wa kawn hka lam shading nna hka madim galaw na nga gabaw hta ginra masha ni makawp da ai ginra ni hta shi nan mung jak kaba shadun ja htu ai hte shadun da ai jak sai ni hkan na ahkun hta sha nga ai lam ginra masha ni tsun ai kaw na chye lu ai.

Machyang Baw ginra mali hta lahta daw ginra ni hta gaw ginra masha ni nan ja htu sha ai lam n nga hkra makawp maga da ai re, dai shara ni hta Hk.L.Y 46 lit nga salang wa nan mung galaw sha ai sha n-ga galaw sha ahkang jaw da ai jak sai ni kaw jak sai langai hta sen 15 hta nna galaw sha ahkang jaw da ai re lam Machyang Baw ginra masha ni tsun ai kaw na chye lu ai.

Makat Mung mare kaw nna mung masha langai tsun ai hta “dai shara hkan ja grai pru ai re gaw chye ai le, raitim ginra masha ni pyi n galaw shangun hkra rai di makawp maga da ai re, hpa majaw nga yang hka lam hten za ai, hkauna ni de hka lim wa mai ai, dai majaw ja htu na ahkang n jaw da ai shara re, raitim myen hpyen dap lit nga ai salang ni nan hka lam sharai ya na, hka madim galaw na nga na ja htu sha taw ai shata masum daram rai wa sai, ya yu yang hka madim galaw na masing mung n mu ai, ya gaw Mali hka ka-ang hkan mung ga shinbut ni grai sum bum wa sai, mare masha ni kadai mung n gwi tsun shaga ai, ya grau hka lam ni hten za wa sai” nga nna tsun ai.

Mali hka mahkrai lahta daw Machyang Baw gaiwang kata hta hka shang jak sai ni bungli shang ahkang jaw da ai masa hte seng nna ginra masha langai tsun ai hta “Lai wa sai shaning ni hta gaw dai shara ni hpe ja ja ninghkap makawp maga da ai re, dai ning gaw lit nga ai myen hpyen dap salang ni nan ahkang jaw nna htu ai hta ahkun hta sha ai re majaw ganing n di sai, grai nan tinggyeng myit hkrai myit ai, grai n tara ai re” nga nna ginra masa hpe myit npyaw ai lam tsun wa ai re.

Putao Mahcyang Baw ginra Mali hka mayan ja maw law law nga ai re, ginra masha ni gaw hkau na galaw lu galaw sha ai shara hte ni gahtep ai ginra ni hkan gaw mai byin ai daram ja htu sha ai lam n nga hkra makawp maga da ai raitim n dai hpang daw de gaw shara shagu htu sha wa ai re hpe chye lu ai. Ya aten Putao ginra de ja sau taw wa ai masa langai a majaw ja maw law law wa pat wa ai raitim myen hpyen dap salang wa galaw nga ai Makat Mung mare mayan Hka Shi mare mayan hta gaw ja htu ai lam hpe matut manoi galaw nga dingyang re lam ginra masha ni tsun ai re.

Shiga - Mali hku