Hkau Na Pa Hta N Kapaw Shi Ai Lak Nak Kaba Ni Ngam Nga Ai Majaw Nam Ma Nan Zalaw Mare Masha Ni Myit Tsang Nga Ai Lam

Pajau Media

September 16, 2025

Mohnyin ginra Nam Ma Nan Zalaw mare kaw n kapaw shi ai laknak langai Hkauna Pa kaw nga ai majaw ginra kata na hkauna galaw sha masha ni myit tsang nga ma ai re lam chye lu ai.

“ Hkauna kaw wa hkrat ai laknak kaba langai nga ai, gara yang kaw re ngu gaw n mu lu ai, သီတင်းကျွတ် shata htum yang Mam ni dan la na aten du sai, Mam dan ta hta Mam dan jak hte ahtu hkra nna kapaw wa na tsang ai, maning mung Nam Ma amyawk dap kaw nna gap dat ai laknak kaba langai n kapaw ai sha Hkauna Pa kaw nga taw ai hpe n chye ai, dai hpe Naw Hpu dan ai jak hte wa hkra nna kapaw ai majaw masha hkala mat ai, ya ma dai hku byin na tsang ai ” nga nna Nan Zalaw mare masha langai tsun ai re.

August 18 ya shani Nam Ma Nan Hkan mawdaw lam hta Myen hpyen dap hte KPDF hpung ni gasat gala byin nna Myen hpyen dap masha marai lahkawng asak si sum nna marai lahkawng hpe KPDF hpung ni rim woi mat ai lam byin lai wa sai re.

Dai mabyin byin ai hpang Namma Amyawk dap kaw nna lahkawng ya tup laknak kaba gap bang ai hta mare kata de wa hkrat kapaw nna masha hkala ai lam nga ai hte Hkauna de hkrat ai laknak kaba n kau n kapaw ai sha naw ngam nga ai lam ginra masha ni tsun ai re.

Ya aten Nam Ma Nan Zalaw mare baw kaw nna Mung masha dum nta hkan Ka-ni lu sha ai Tatma 33 kata na myen hpyen dap hpung ni shara la nga nna Mung masha ni hpe laja lana jep joi nga ai lam chye lu ai.

Shiga - Kachin pyi tar