Hkawng Lang Hpu Ginra De Hpyen N-gun Jat Shamu Ai Lam Shani Shagu Galaw Nga Ai Lam

Pajau media

November 19, 2025

Putao Hkang Lawng Hpu ginra de myen hpyen dap gaw lagaw lam hku hpyen shamu ai lam, ntsa lam hku nna mung shani shagu putao kaw na gin hkrang shamu shamawt nga ai lam ginra masha ni tsun ai .

“ Nbungli n lung ai shani n nga ai, shani shagu nan sa ai, hpyen n-gun malu masha jahting ai re sam ai, ra lata poi mung ni wa sai re nga yang gaw shimlam la ai kun, Nbungli lai yang mung galoi wa mi jahkrat dat na kun ngu ai myit gaw galoi mung rawng , na taw ai shiga ni gaw Lang Se bai la na nga ni gaw na taw ai” nga nna Putao ginra masha tsun ai.

Myen hpyen dap P.T.Ts pawng hpawm hpung ni gaw myen mungdan ting madang hku galaw hkyen nga ai ra lata poi hpe Putao Hkawng Lang Hpu ginra kaw Tsa lam shadang hpring lu galaw hkra ngu ai masing hte ginra makawp ai lam laja lana galaw nga ai masa re lam mung tsun ai re.

Ya aten Putao ginra Myen hpyen dap P.T.ts pawng hpawm hpung ni gaw shara shagu de hpyen shamu shamawt ai lam grau galaw wa ai hta lai wa sai November 16 ya hta mung Machyang Baw ginra Mali Hka mayan hte kaw KIA pawng hpawm hpung ni hte gasat poi byin ai lam chye lu ai. Dai hpung ni gaw Hkawng Lang Hpu maga de hpyen garum sa wa ai ni rai nna KIA hkap gasat ai hta Lung Sha Yang makau Tan Ja maga de hting nut mat ai lam chye lu ai.

Putao Hkawng Lang Hpu ginra de Myen hpyen dap pawng hpawm hpung ni gaw 2025 October shata kaw nna hkawng Lang Hpu ginra kata na Myen hpyen dap pawng hpawm hpung ni a Dap shara 4 daram tat sum kau ai hpang kaw nna Hkawng Lang Hpu maga de hpyen n-gun jat shamu shamawt ai lam grau galaw wa ai re hpe mung chye lu ai.

Shiga -Pyilan U