Hkawng Lang Hpu Ginra Na Hpaji Jawng Ni Hta Sharin Sara N law Ai Mayak Hkrum Nga Ai Lam

Pajau Media

January 14, 2026

Putao Hkawng Lang Hpu ginra kata na lawu tsang, lahta tsang jawng ni hkan sharin sara/ saranum n law ai mayak hkrum sha nga ai lam ginra masha ni kaw na chye lu ai.

“Du wa na hpaji ladaw hta Hkawng Lang Hpu maga de lahta tsang jawng lu hpaw na n hpaw na n chye tsun shi ai, ya aten Cyi Lar Wadi (ချီလာဝါဒီ) kaw na Jawng mung pat da ai, Tsang Yaw hte Hkawng Lang hpu Muklum kaw na jawng lahkawng sha hpaw ai” nga nna ginra masha ni tsun ai re.

Ya aten Hkawng Hpu ginra hta lahta tsang jawng 3 nga ai raitim Jawng 2 hpe sha lahta tsang jawng madang hku hpaw lu ai re lam chye lu ai. Raitim sharin ai sara/ num n law ai majaw tang du hkra n lu hpaw ai mayak law law nga ai re lam chye lu ai.

“Sharin sara n law ai majaw jawng ma ni a matu grai yak ai, du wa na shaning hta gaw Tsang Yaw jawng gaw lu hpaw na n lu hpaw na n chye shi ai, sharin sara/ num ni n du mat sai, hkrun lam mayak a majaw sha n-ga gunrai manu mayak ni, asuya kaw na mung n lu hparan ai majaw ma ni a matu hpaji lam grai yak hkak nga ai re” nga nna ginra masha matut tsun ai re.

Ya aten Hkawng Lang Hpu ginra kata lahta tsang jawng ma ni gaw Putao, Machyang Baw ginra de sa nna hpaji wa sharin la ra ai raitim kanu kawa ni n lu tawn ai majaw ginra kata na ma ni a hpaji lam grai hkrat sum taw nga ai re.

Hkawng Lang Hpu ginra de gunrai htaw shalai, hkawm sa hkrun lam hten za nga ai gaw 3 ning daram na wa sai hte lagaw lam hku bat mi tup hkawm nna she mai hkawm sa nga ai re hpe mung chye lu ai.

Shiga: Mali Hku