Hkawng Lang Hpu Maga De Hpyen Shamu Shamawt Lam Grau Laja Wa Ai Lam

Pajau Media

November 5, 2025

Putao Hkawng Lang Hpu Ginra na Myen hpyen dap hte P.T.Ts pawng Hpawm Hpung ni a Dap shara ni langai hpang langai hpe Rawt Malan Hpung ni zing madu ai hpang kaw nna myen hpyen dap gaw ndai laman dai ginra de Helicopter hte hpyen n-gun Laknak n-gun jat bang nga dingyang re lam chye lu ai.

"N dai laman Hkawng Lang Hpu maga de Byuha nan dung na Hpyen n-gun jat nga ai re, shanhte a Dap shara 4 daram sum mat ai hpang Nbungli ni matut manoi sa taw ai Bat Lahkawng daram re taw sai" nga nna Hkawng Lang Hpu Ginra masha tsun ai.

October hpang jahtum bat kaw nna Myen hpyen dap gaw Hkawng Lang Hpu ginra de shani shagu Helicopter lahkawng lang daram sa nna hpyen arai, masha n-gun, matut manoi jat bang nga ai re hte Nbungli bawm jahkrat ai lam ni grau galaw nga ai re.

Dai majaw ya aten ginra masha ni law malawng gaw mare hkan shimlam n nga ai majaw Bum de koi yen nga ai rai nna Hpyen masa hpe matut yu maram let nga taw ai lam mung tsun ai.

"Hkawng Lang Hpu Maga kaw na Lang Se maga de htu shadut na matu shakut nga ai, Putao Byuha kaw na Nbungli ni hte matut manoi bawm jahkrat ai, dai ginra hkan na masha ni gaw ya aten Nam de koi yen ai ni gaw yen, hpa byin wa na kun n chye sai" nga nna tsun ai re.

Phone, Internet matut mahkai yak ai majaw hprawng koi yen ai Mare kahtawng a masa lam ni, Hpyen masa ni hpe tup hkrak chye lu na matu yak ai hte Pajau Media kawn matut sagawn nga dingyang re.

Ginra masha ni gaw Putao - Myitkyina Mawdaw hkrun lam pat da ai hpang kalang ta Hkawng Lang Hpu Ginra de Hpyen masa grau shaja wa ai re hpe mung chye lu ai.

Shiga- Mali Hku