Hkawng Lang Hpu P.T.Ts Hpung Ni Starlink Wifi Jak Ni Rim Ai Lam

Pajau Media

July 30, 2025

Hkawng Lang Hpu ginra kata July shata laman Hkawng Lang Hpu P.T.Ts hpung ni gaw Starlink Internet Wifi Jak ni hpe jep joi rim ai lam ni galaw nga ai nga nna ginra masha ni kaw na chye lu ai.

“ Hkawng Lang Hpu ginra de Starlink Wifi Jak ni shakap da ai seng ni hkan na Jak ni yawng hpe P.T.Ts ni zing mat ai re, shanhte hte hpyen dap ni madu ai Jak ni daram sha hpaw mat sai, hpa majaw zing ai ngu ma n tsun ai, lahta kaw na matsun hte zing ai re nga nna zing mat sai ” nga nna Hkawng Lang Hpu ginra na Hpung magam gun sara langai tsun ai kaw na chye lu ai.

Shing Hkawng Ginra sa lam ntsa kaw nga ai Zang Yaw Ninghtawn kata na Makam masham Nawku Jawng Wang kata kaw Starlink shakap da nna Mung masha ni manu jahpu n jaw ai sha lang nga ma ai re, dai Starlink Jak hpe mung lai wa sai bat laman zing madu mat ai re lam chye lu ai.

Dai sha n-ga kaga Wifi Jak ni hpe mung lahta matsun nga nna yawng zing ma ai re hte Wifi Jak law malawng gaw P.T.Ts ni zing madu kau sai rai nna Hpyen dap madu ai jak ni daram sha nga sai lam chye lu ai.

Hkawng Lang Hpu ginra gaw Putao ginra kata na hkawm sa hkawm wa matut mahkai lam yak hkak dik ai ginra rai nna Hkawng Lang hpu ginra sha n-ga Jinghpaw mung ting hta lai wa sai 2024 July 21 kaw nna Phone Internet Line ni yawng dawm jahkring kau gaw n dai shata hta laning mi hpring mat sai re.

Dai aten kaw nna Jinghpaw Mung kata Starlink Wifi jak ni hpe dam lada ai hku jai lang wa nna Internet seng ni hkan hkying hkum mi hta lap (20,000) jaw nna jai lang hpang ai gaw ya aten du hkra re hpe mung chye lu ai.

Shiga- Mali Hku