Hkrun Lam Htenza Ai Majaw Putao Sinpraw Hkran Ginra Na Mung Masha Ni Grai Yak Hkak Nga

Pajau Media

June 10, 2025

Lanam shang ai aten bat hku marang n hkring nsa htu ai majaw Putao sinpraw hkran ginra Sengke lam ni yawng gyi ru htenza mat nna hkawm sa hkawm wa yak hkak nga ai gaw ya aten du hkra re.

Sinpraw hkran ginra hkawm sa lam hpe mung masha n-gun hte sha Sengke lam mai hkawm hkra htu baw da ai hta ya aten marang htu sawng ai majaw yawng htenza mat nna hkawm sa hkawm wa lam grai yak nga ai lam ginra masha langai tsun ai.

“Bum lam re majaw marang masum mali ya htu ai hte lam gyi ai, hka kaba nna lam ni yawng htenza mat ai, dai de Sengke lam hkrang ai mali ning daram sha naw re, dai pyi mung masha n-gun hte htu la ai, shawng daw de gaw lagaw lam lahkawng ya daram hkawm ra ai ginra re, grau na gaw makawp maga tsi htu ra ai ma kanu ni na matu grau yak ai, ma tsi htu ra ai re nga yang gaw lam kaw yup nna hpang shani she du ai raitim shakut sa ra ai, Sengke hte rai yang lani mi hte pyi Putao mai du ai re wa,” nga nna tsun ai.

Dai ginra masha ni gaw Jum, Sau, Shakau kaw na hkawt Machyang Baw, Putao Muklum de na htaw sha ai re hte machyi makaw byin sawng wa yang mung myo de sha tsi wa tsi la ai re.

Mare kata kaw tsi jaw gawk ni gaw nga ai raitim lahkawng ning npu ma ni hpe makawp maga tsi htu ya na tsi n nga ai majaw myo de wa htu ra ai re hta ya na zawn hkrun lam hten za nna Sengke n mai hkawm ai hta grai yak hkak nga ma ai lam chye lu ai.

Dai ginra a hkawm sa hkrun lam hpe lai wa sai asuya lak htak shagu hta mung lam galaw ya na matu hpyi shawn lai wa sai raitim asuya kawn dep hkap ai lam n nga ai ginra langai mung re.

Dai hpe ginra masha n-gun hte Sengke lam htu baw nna mai hkawm sa ai shaning mali manga ning daram sha naw re hte Putao sinpraw hkran ginra hta Dinghkat, Dingga, Marawt, Ma Pyung, Dingsa mare ni hkawm sa nga ai hkrun lam re hpe mung chye lu ai.

Shiga- Pyilan U