Hopin Amare Hta Nta Masha Marai 6 Sat Hkrum Ai Mang Hkang Byin

Pajau Media

March 5, 2026

Jinghpaw Mung Mobyin ginra Hopin muklum hta March shata praw 4 ya shana hkying 11 aten hta, nta masha marai 6 ting, sat hkrum ai mang hkang byin ai hpe chye lu ai.

Dai mabyin gaw Hopin muklum Mya Tar Yar lawk hta byin ai rai nna, makau grup yin nta htingbu ni mung, madu jan madu wa ga-law mang hkang byin ai ngu maram let, nchye dat ai lam ginra masha langai tsun dan ai.

“Ndai kaw sat hkat taw sai, hkye la rit nga marawn nsen na dat ai raitim, madu jan madu wa tsun ga-law hkat ai sha shadu taw ai. Num sha asak laning mi jan hte shadang sha kaji yan gaw shat gawk hta madu wa gaw shi nlung garang ai shara hta sha lata hte baw di sat da hkrum ai. Madu jan gaw yup gawk hta si taw ai, nta masha ting masha kaba marai 3 hte ma kaji marai 3 yawng hpe sat kau da ai hku re.” nga nna tsun dan ai.

March shata praw 5 ya jahpawt hta sha, mang hkang byin ai nta de hka ja sa ai ma langai mu nna, gat dut nga ai shi a kanu ni hpe tsun dan yang she, ndai nta masha sat hkrum ai lam hpe, chye lu ai re.

Mang hkang byin ai nta hta na chyinghka kaba gaw loi mi hpaw kalap taw ai re hte, sut gan zing ai wan hkang sutdek mung, nba hte hkayawp nna, nta shawng hta mu lu ai lam chye lu ai.

Asak 41ning re ai Slg.Kyaw Myat Oo, asak 42 ning re ai Shy.Mi Mi, asak 11 ning re ai shd. Bone Khant Kyaw, asak 27 ning re ai Jan Ei Phyu, asak 9 ning re ai shy. Yu Wati Kyaw hte shy. Yun Wati Kyaw ni hpe nhtu ningma hte si taw ai hpe, wa mu ai lam chye lu ai.

Ya aten ndai mang hkang hte seng nna, lit nga ai salang ni kawn jep joi nga nna, amu hpaw jawat sa wa na matu hkyen lalang nga ai re hpe matut chye lu ai.

Shiga – Kachin Pyi Tar