Manmaw Hte Waimaw Hpyen Man De Laknak Kaba Dingyang Gap gasat Nga

Pajau Media

5th March,2026.

KIA Masat (3) Dap Ba, Manmaw hpyen man hte KIA Masat (5) Dap Ba Waimaw hpyen man maga de Myen Hpyen Dap kawn lak nak kaba hte ding yang gap gasat nga ding yang re lam chye lu ai.

Manmaw hpyen man maga hta gaw masat (1) lahta tsang jawng hte Kan U hpunggyi jawng hta shara la da ai Myen Hpyen Dap kawn KIA hte pawng hpawm hpyen hpung ni shara la nga ai Sin Kung, Kan Do lawk, Baha Di lawk de lak nak kaba gap gasat ai lam hpe March shata praw kaw nna galaw nga ai rai nna, Nam Hpa, Ta Mai Lung Dakkasu jawng makau grup yin de mung jet nbungli hte bawm jahkrat gasat ai lam, drone gap gasat ai lam ni hpe ding yang galaw nga ai re.

Myen Hpyen Dap gaw KIA hte pawng hpawm hpyen hpung ni shara la nga ai Han Te lawk hta mung hpyen n gun kaba hte htu shadut kasu kabrawng lung wa ai majaw, KIA hte pawng hpawm hpyen hpung ni mung ninghkap gasat nga ding yang re lam chye lu ai.

Manmaw Deng 3 ginra hta mung, Hk.L.Y 236, Ts.K.Hk 21 dap ni kawn, 120MM, 81MM, 60MM ngu maram lu ai lak nak kaba hte ding yang gap shadam gasat nga ai re.

Dai hta n ga, KIA Masat (5) Dap Ba, Masat (3) Dap Dung ginra, Waimaw hpyen man Mai Na Man Pya Bum kaw dap shara la nga ai Myen Hpyen Dap kawn mung, KIA shara la nga ai Wak Bum grup yin hte Nmyen Bum grup yin shara de 120MM, 81MM ni hte gap gasat nga ai gaw March shata praw kaw na re lam chye lu ai.

Shiga - Htu Seng