Hopin Ginra Kata Shim Lam Gawan Hkawm Ai Myen Hpyen Dap Ni Gap Hkrum Ai Hpang HK.L.Y (40) Kaw Nna Laknak Kaba Gap Shadam Ai Lam

Pajau Media

November 13, 2025

Jinghpaw Mung Hopin Muklum kata November 12 ya jahpawt daw hta ginra kata cycle hte ginra hkan gawan hkawm ai Myen hpyen dap hpung ni hpe Muklum Num Shang shagyit hta rawt malan hpung ni kawn htim gasat ai lam nga ai re hpe chye lu ai.

Jahpawt daw hta lahkawng maga gasat gala majan byin ai rai nna Myen hpyen dap maga na marai (3) asak si sum nna KPDF maga na mung marai (1) Asak si sum ai lam ginra shiga ni hta tang madun da ai.

 Myen Hpyen dap gaw shana daw hta Hopin HK.L.Y 40 dap kaw nna Muklum a sinpraw maga de laknak kaba gap shadam ai lam galaw ai re hpe mung chye lu ai.

Myen hpyen dap gaw gasat gala majan hta sum machyi ai lam nga ai hte Laknak kaba hkrup mara gap shadam ai lam ni galaw ai majaw majan hte n seng ai Mung masha ni asak si sum hkra hkala ai lam Jinghpaw Mung kata shani shagu byin hkrum nga ai re hpe mung chye lu ai.

Dai sha n-ga Myen hpyen dap hte Sam Hkyeng P.T.Ts pawng hpawm hpung ni gaw Muklum a sinpraw maga Nam Yin mare maga de hpyen hpung hku htu shadut ai hpang Kat Kung (ဂတ်ကုန်း) hpung gyi jawng kaw dap jung ai lam chye lu ai.

Myen hpyen dap pawng hpawm hpung ni gaw Rawt malan hpung ni shara jahkrat na re ngu maram lu ai shara ni de Drone bawm wa jahkrat ai lam ni nga ai re hpe mung chye lu ai.

Shiga – Pyilan U