Hpakant Ginra De Htu Shadut Ai Myen Hpyen Hpung Ni Gaw Lai Wa Lam Lapran Kaw Mung Masha Hpe Rim Woi Ai Lam Galaw Nga

Pajau Media

August 25.2025

Myen hpyen hpung ni gaw lai wa sai August 21 ya daram kaw nna Hpakant ginra de hpyen n-gun kaba hte kalang bai htu shadut wa ai rai nna Hpyen hpung shamu shamawt hkawm ai hta Mung masha ni hpe rim woi mat ai lam nga ai re hpe mung chye lu ai.

August 24 ya shani hta mung Hpakant Nam Ma pyit, Maw Si Zar mayan hku htu shadut lung wa ai hta Mung masha La marai (9) hpe rim woi mat ai re hte bai dat ya ai shiga gaw ya du hkra n na shi ai nga nna Hpakant ginra masha langai tsun dan ai kaw na chye lu ai.

August 21 ya hpang kaw nna Nam Ya lam hku nna htu shadut wa ai Myen hpyen hpung ni gaw Hpakant Tatma Kawng hte Gin Si Pyuha Kawng ni de hpyen n-gun garan nna jahpring jat nga dingyang re lam dai ginra masha tsun dan ai re.

Ya aten Myen hpyen hpung ni gaw Hpakant ginra hkawm sa lam Lawa kaw nna Lawng Hkang shang wa ai Lay Pin Yam shadu jak du hkra shara la da lu sai re hte Hpakant lam mayan shara la nga ai Myen hpyen hpung ni gaw hkawm sa hkawm wa Mung masha ni hpe Mung Chying masat jep joi ai lam laja lana galaw nga ai re hpe mung chye lu ai.

Hpakant ginra de ndai laman Ka Mai, Nam Ya lam hku nna htu shadut lung wa ai Myen Hpyen Hpung ni hpe maram yu yang Hpyen n-gun (800) grup yin nga na hpe Mung masha ni tsun maram nga ma ai re .

 Ya na zawn Hpakant ginra de Hpyen n-gun kaba htu shadut wa ai gaw Hpakant ginra hpe Myen hpyen dap Jum tek kau nna Myen mungdan ting madang hku galaw hkyen nga ai ra lata poi hpe atsawm sha lu galaw na matu yaw shada ai majaw shimlam la ai hku nna hpakant ginra de hpyen n-gun matut manoi htu shadut taw ai masa re lam Mung masa maram masam nga ai ni tsun nga ma ai re hpe mung chye lu ai.

Hpakant ginra de hpyen n-gun htu shadut nga ai sha n-ga Mung masha ni nga ai de lak nak kaba gap shadam ai lam shani shagu ngu na galaw nga ai majaw majaw ndai laman Mung masha si hkala hkrum ai lam law nga ai re hpe mung chye lu ai.

Shiga - Pyilan U