Hpakant Ginra De Majan Bai Byin Nna Hpyen Masa Grai Shaja Hkat Nga Ai Lam

Pajau Media

November 26, 2025

Jinghpaw Mung Hpakant ginra hta lai wa sai November 10 ya kaw nna gasat gala majan laja wa ai hpang gasat gala loi zim mat ai raitim November 25 ya kaw nna gasat gala bai byin wa ai re lam ginra masha ni kaw na chye lu ai.

Lai wa sai shani ni hkan mung gasat gala majan zim tim Myen hpyen dap Nbungli hku sha n-ga Drone hte laknak kaba shani shagu gap ai lam ginra masha langai tsun ai.

“ Gasat gala majan zim ai raitim Myen hpyen dap gaw nbungli shani shagu gap ai” nga nna Hpakant ginra masha tsun ai.

November 25 ya shana hta mung Hpakant Yuma mare maga de Y-12 Nbungli hte Drone bawm ni wa jahkrat ai majaw Mung masha dum nta hten za ai lam chye lu ai. Dai sha n-ga Lawng Hkang, Gade Maw mare de mung Myen hpyen dap a Drone Bawm wa jahkrat ai majaw Gade Maw Nawku Jawng wang kaw nga ai Sara nga nta hte Nawku jawng kaw lang ai Mawdaw ni hten za mat ai lam chye lu ai.

Myen hpyen dap gaw Nbungli bawm, Drone hte laknak kaba gap ai majaw November 10 ya kaw nna 25 ya du hkra Mung masha marai 6 asak si sum nna marai 10 hkala hkrum ai lam chye lu ai.

 Shiga- Hpring