Hpakant Ginra De Myen Hpyen Dap Ni Shani Shagu N Bungli Htim Gasat Nga Ai Lam

Pajau Media

July 16, 2025

Hpakant ginra hta Myen hpyen dap gaw n bungli bawm jahkrat gap gasat ai lam shani shagu galaw nga ai re hpe chye lu ai.

July 16 ya Hkying 12:10 PM aten daram hta n bungli hte wa gap gasat ai lam chye lu ai. N bungli bawm a majaw hten za sum machyi ai lam ni hpe tup hkrak n chye lu shi ai re hte matut sagawn nga ai re hpe mung chye lu ai.

Dai sha n-ga July 15 ya jahpawt daw Hkying 11:40 aten daram hta mung Maw Mau Bum hte Maw Mau layang maga de Myen hpyen dap n bungli bawm wa jahkrat ai sha n-ga hak sinat ni hte mung wa gap bun ai re hpe mung chye lu ai.

Dai shani hta sha Wai Maw Lamyang maga de mung Hkying 1:40 PM aten daram hta Myitkyina maga kaw nna lung wa ai Myen hpyen dap n bungli hte bawm wa jahkrat bun ai lam hte Myityina Muklum hta gaw Jahpawt jau hkying 4:00 Am aten daram hta gaw lak nak kaba masum lang lahta ngoi gara ai lam chye lu ai.

“ Jahpawt hkying 4 jan daram kaw re, Hpaji rung nga ai lawk de lak nak kaba wa hkrat ai, Mung masha lahkawng hkala ai, shawng daw hta gaw Motor sinat n sen ni grai ngoi na ai, lak nak kaba lai mat ai shadang gaw grai ni taw nga, Myitkyina Muklum kaw nga taw tim galoi mi lak nak kaba tinang kaw wa hkra na ngu hpe la taw ra ai masa she re” nga nna Myitkyina ginra masha tsun ai.

July 14 ya sani hta mung Maw Mau Bum kaw n bungli bawm wa jahkrat ai majaw Hpaji jawng boarder ni hten za mat ai re. Hpakant ginra hta ya aten Myen hpyen dap hte KIA Pawng hpawm hpung ni hpyen masa grai shaja hkat nga ai re hte n bungli, Drone, Lak nak kaba ni hte matut manoi gap bun nga ai re hpe mung chye lu ai.

Shiga - Htu Seng