Hpakant Ginra Gasat Gala Majan Laja Ai (2) Ya Laman Mung Masha Marai (3) Asak Si Sum Nna Marai 10 Hkawt Hkala Sawng Ai Lam

Pajau Media

August 5.2025

Jinghpaw Mung Hpakant ginra Sharaw Hka hte Nyawng Pin Kung hta gasat gala majan laja ai lahkawng ya laman Myen hpyen dap gap dat ai lak nak kaba si a majaw asak (5) ning re ai Ma kaji hte Mung masha marai (3) asak si sum nna hkala sawng ai mung masha marai (10) hkawt nga ai lam chye lu ai.

Gasat gala majan hta Myen hpyen dap gaw lak nak kaba hkrup mara gap bang ai rai nna August 4 ya jahpawt daw hta Lak nak kaba si gaw Myauk Phyu mare kaw na Mung masha dum nta kaw wa hkrat nna asak (5) ning re ai Ma langai, Asak (35) ning re ai La langai asak si sum nna marai (7) hkala hkrum ai lam chye lu ai.

Dai shana daw hta sha Sharaw Hka Nat Zin Kung kaw Lak nak kaba wa hkat ai majaw asak (21) ning re ai Rahkai amyu sha ramma langai asak si sum nna Mung masha langai mung hkala sawng ai lam nga ai sha n-ga San Chyoi mare kaw mung wa hkrat nna Mung masha (2) mung hkala sawng ai lam chye lu ai.

Ndai shiga masa hte seng nna Hpakant ginra masha tsun ai hta “August (3) ya kaw nna KIA/KPDF maga kaw nna Sharaw Hka hte Nyawng Pin Kung maga de htu shadut htim gasat ai hta Myen hpyen dap gaw majan byin ai de sha n-ga Mung masha ni nga ai ginra de du hkra lak nak kaba gap bun ai, dai na de gaw Ma kaji mung lawm mat ai, Mung masha a matu hprawng shara mung n nga sai” nga nna tsun ai re.

Hpakant ginra Sharaw Hka hte Lagat Kawng ( Nyawng Pin Kung ) maga de August praw kaw nna gasat gala majan laja nga ai ai hta Lagat Kawng hpe gan yen kau da ra ai re hpe chye lu ai. August (3,4) ya laman kalang bai htu shadut htim gasat ai hta Myen hpyen dap kawn Lak nak kaba hkrup mara gap bun ai majaw Lahkawng ya laman Mung masha marai (3) asak si sum nna marai (10) hkala sawng ai re lam chye lu ai.

Shiga- ND

Photo credit to Owner