Hpakant Ginra Gasat Gala Majan N Nga Tim Myen Hpyen Dap Gaw Shani Shagu Laknak Kaji Kaba Gap Nga Ai

Pajau Media

November 20, 2025

Ya aten Jinghpaw Mung Hpakant ginra kata shada gap gasat ai lam n nga ai raitim shani shagu sinat kaji kaba gap shangoi ai lam galaw nga ai hte sinat n gap yang Drone bawm gap bun ai lam ni dingyang galaw nga ai re lam ginra masha ni tsun ai re.

“ Hpakant de gaw shani shagu shangoi dingyang rai nga, shani n ngoi yang shana ngoi re di, zim ai ngu lani mi pyi n nga, sinat kaji n ngoi yang kaba ngoi dai hku rai taw ai, Myen ni shanhte na shanhte shangoi ai re, shana hkan mung majoi mi gap dum bre, dai hku gap ai wa hkying hkum hku mung na hkra re taw nga, kalang lang chyawm shanhte gap shangoi ai nau na yang anhte maga kaw na bai gap dat yang gaw lahkawng masum ya gaw bai zim na bai ngoi dai hku re taw” nga nna Hpakant ginra masha langai tsun ai re.

Myen hpyen dap gaw sinat kaba n gap yang Drone bawm jahkrat ai lam shani shagu galaw ai majaw Mare kata Mung masha asak si hkala hkrum ai lam shani shagu nga ai re hpe mung chye lu ai. Lai wa sai November 18 ya shani hta mung Hpakant Mashi Kahtawng kaw ginra masha Lung Seng htu shap bungli galaw nga ai shara kaw Drone bawm wa jahkrat ai majaw Lung Seng Htu shap bungli masha si hkala hkrum ai lam chye lu ai.

 Ya aten Hpakant ginra gaw hpyen masa grai shaja hkat ai ginra rai nna shada gap gasat ai lam n nga tim laknak kaba, Drone, Nbungli bawm ni gaw shani shagu gap bun nga ai re hpe chye lu ai. Dai sha n-ga myen hpyen dap gaw gasat gala majan n byin ai Sadung ginra de November 16 ya shani Nbungli bawm wa jahkrat bun ai lam galaw ai hta masha si hkala ai lam gaw n nga ai re hpe mung chye lu ai.

Jinghpaw Mung kata October shata laman Nbungli htim gasat ai majaw Mung masha asak si sum ai hte hkala hkrum ai masha marai (9) nga wa sai lam, dai hta marai (1) gaw asak si sum nna marai 8 hkala hkrum ai re lam Kachin Human Rights Team kawn tang madun da ai kaw na chye lu ai.

Shiga – Pyilan U