Hpakant Ginra Hta Damya Mya Ai Manghkang Jahkring Hkring Byin Nga Ai Lam

Pajau Media

August 13, 2025

Jinghpaw Mung Hpakant ginra hta n dai laman gasat gala majan jahkring hkring byin ai sha n-ga maga mi de Mung masha ni Damya mya hkrum ai manghkang ni jahkring hkring hkrum sha wa ai lam ginra masha ni tsun ai kaw na chye lu ai.

Lai wa sai August 12 ya shana hkying 8:00 PM aten daram hta mung Hpakant Lawng Hkang သံတံတား makau kaw ginra Mung masha langai jawn wa ai mawdaw hte gumhpraw Sen 80 daram damya mya la kau ya ai re hpe chye lu ai.

Damya hpung ni gaw masha marai (3) lawm ai hpung ni re hte Cycle langai kaw sha chyawm jawn ai rai nna Mawdaw makau de du ai aten Mawdaw gau ai wa hpe sinat hte madi nna mawdaw ntsa kaw na gang shayu la nna Mawdaw hpe mung mya la kau ya ai lam chye lu ai.

Lawng hkang ginra masha langai tsun ai gaw “ Lawng hkang maga de grau grau sawng wa ai, nye jinghku ni kaw mung marai 3 daram rai sai, damya mya hkrum ai, Myen hpyen dap ni du shang wa ai kaw nna byin hpang ai re, kadai ni mya ai re ngu gaw ntsun ai, Mung masha ni hpe gaw hkum mya mu, lani hte lani gara de hprawng ra na, hpa sha na myit ai hte pyi myit htum ai lam gaw dik mat sai. ” nga nna tsun ai re.

Dai sha n-ga lai wa sai July shata htum maga hta mung Mashi Kahtawng kaw nga ai ginra masha langai a dum nta kaw mung sinat hpai ai masha marai (3) shang wa nna Phone, Cycle, Ja hte Gumhpraw ni yawng gashun la mat ai lam chye lu ai.

Ya aten Hpakant ginra masha ni kaw hpyen masa sha n-ga gunrai manu tsaw ai lam, gunrai taw ai mayak ni hkrum katut nga ai hta shimlam hpe du hkra grai myit tsang ra ai madang byin nga ai re hpe chye lu ai.

Shiga - ND