Hpakant Ginra Hta Gap Sat Hkrum Ai Manghkang Shani Shagu Ngu Na Daram Byin Nga Ai Lam

Pajau Media

July 3.2025

Jinghpaw Mung Hpakant ginra hta kadai gap sat ai re n chye ai masha moi mang shani shagu ngu na daram mu nga ai gaw shata mi daram matut manoi byin nga ai lam chye lu ai.

Lai wa sai May shata htum maga kaw nna matut manoi byin nga ai re hte sat hkrum ai masha ni hte seng nna kadai gap sat ai hpe n chye lu ai sha n-ga hpa majaw sat hkrum ai ngu hpe n chye lu ai lam Hpakant ginra masha ni tsun ai.

Law malawng gaw moi mang ni hpe Lam braw hkan, Hka Hkawng hkan taw ai hpe mu lu ai sha n-ga Hka kaw yawng yu wa ai Moi mang ni mung lawm ai hte n dai zawn re ai mabyin gaw n dai laman matut manoi byin nga ai re hpe mung chye lu ai.

Moi mang ni hta sinat hte gap sat hkrum ai ni law nga ai rai nna zing ri nna sat kau hkrum ai ni mung lawm ai raitim kadai ni, hpa majaw galaw ai ngu hpe n chye lu ai.

July praw 2 ya shana daw hta mung Mashi kahtawng lawk kaw mying n chye lu ai La langai gaw si nat hkang hte re na asak si sum taw ai hpe mu lu ai lam, July praw langai ya shani hta mung Lawng hkang Lup wa kawng makau kaw La langai gap sat da ai hpe mu lu ai lam chye lu ai. Hpakant ginra hta June praw kaw nna gap sat hkrum ai masha shani shagu ngu na daram re taw ai hpe chye lu ai rai nna lani hte lani gap sat hkrum ai masha law wa ai re.

June shata laman hta Hpakant ginra kaw kadai galaw ai re n chye sha sat hkrum ai Moi mang 11 daram nga ai lam Myanmar Now kaw tang madun da ai. Kachin Human Rights Watch kawn mung Myen hpyen dap kawn shinggyim ahkaw ahkang tawt lai nna asak si sum ai masha Jinghpaw Mung kata hta marai (17) du hkra nga ai lam, Hpakant ginra gaw shinggyim ahkaw ahkang lawt lai ai amu manghkang law dik ginra re lam mung tang madun da ai.

Shiga- Htu Seng