Hpakant Ginra Hta Gunrai Manu Ladu Lai Tsaw Rawt Ai Hta Gunrai Taw Wa Ai Lam

Parjau Media

July 24, 2025

Ya aten gasat gala majan laja nga ai Hpakant ginra hta majan a majaw gunrai htaw shalai lam ni grai yak hkak mat ai hta gunrai manu ni ladu lai tsaw rawt wa ai majaw Mung masha ni grai yak hkak nga ma ai lam chye lu ai.

Shan manu ni gaw joi mi kaw sen lam du wa sai re hte nam law nam lap ni du hkra shawoi na hta grau tsaw rawt wa ai re lam chye lu ai. Lawng Hkang ginra masha langai tsun ai hta “ Shan, Nga Manu gaw Joi mi kaw Sen mi grup yin re, raitim gat kaw mari sha na matu tam la yak ai, anhte pyi Hka hkan na Nga ni sha hkwi sha ai, gat kaw gaw U di hkum mi kaw 1,500, Ba Hkri Si Joi mi kaw 30,000, majap joi mi kaw 40,000, Bu lap joi mi kaw 300,000 dai ram pyi tsaw lung taw ai, mari sha pyi n mai wa sai ” nga na Pajau Media de tsun ai re.

N-gu dut hpaga galaw ai Lauban langai tsun ai hta “ N-gu mung rawt taw ai nga tim anhte kaw mung ma taw sai, hpa she shaw dut na re n chye sai, htet gaw htet da ai, mawdaw lam pat da ai majaw maga de hku hpaw yang maga mi de bai pat rai na Hpung lahkawng lapran kaw yak taw nga ai” nga nna mung tsun ai re.

Hpakant Muklum hta gunrai taw ai mayak hkrum sha nga ai 10 ya daram na wa sai re hte Hpyen masa yak nga ai kaw kalang bai gunrai taw ai mayak ni bai hkrum katut rai nna Ginra masha ni grai yak hkak nga sai re hpe mung chye lu ai.

Shiga- ND