Hpakant Ginra Hta Hpyen Masa Laja Wa Nna Mung Shawa Ni Hpe Rim La, Jahkrit Shama Jep Joi Ai Lam Galaw

Pajau Media

21 April 2026.

Hpakant ginra hta Myen Hpyen Dap pawng hpawm hpung ni kawn hpyen n-gun law law hte hpyen htu shadut shamu shamawt nga ai majaw majan matut byin nga ai hpe chye lu ai.

Lai wa sai April 19 ya jahpawt hkying 8 jan ram hta Hpakant ginra maga myen Hpyen Dap hte Lisu P.T.Ts , Wara Zup P.T.Ts pawng hpawm hpung ni kawn htu shadut lung wa ai hta KIA pawng hpawm hpung ni gaw Maw Si Za makau na shara hta ninghkap gasat wa ai majaw majan byin wa ai hpe chye lu ai.

Yaten du hkra lahkawng maga hkrum majan matut byin nga ai hta myen hpyen dap maga kaw na si hkala law ai sha n-ga Lunghkang mare hte Malang mare makau hta mung majan byin wa nna, hpyen dap maga kawn si hkala law wa ai hpe chye lu ai.

Ya na zawn hpyen dap kawn htu shadut nga ai ten Lunghkang mare hta hkawm sa ai mung shawa ni hpe hpyen dap kawn san jep rim la nna jahkrit shama ai ni galaw nga ai hpe ginra masha ni tsun ai kawn chye lu ai.

Dai rim la nna jahkrit shama san jep nga ai hta mung shawa ni a grumhpaw, lungseng, tachyawp hte phone rai ni hpe jep nna zing la nga ai sha n-ga ntsen ai mung shawa ni hpe rim woi mat ai hpe chye lu ai.

Hpakant ginra hta Myen Hpyen Dap hte KIA pawng hpawm hpung ni gaw April praw hkan kaw na majan laja lana kalang bai hpang wa nna, myen hpyen dap kawn Hpakant ginra hpe kalang bai up hkang lu na matu hpyen n-gun law law hte htu shadut gasat nga ai hpe chye lu ai.

Shiga-Htu Seng