Hpakant Ginra Hta June Shata Laman Myen Hyen Dap A Majaw Mung Masha Marai 20 Asak Si Sum Ai Lam KHRW N Dau

Pajau Media

July 2.2025

June shata laman Jinghpaw mung kata shinggyim ahkaw ahkang tawt lai nna Myen hpyen dap kawn zing ri sat hkrum ai Mung masha marai (17) daram nga nna gara lak nak lang hpung a majaw si hkrum ai re n chye ai Mung masha marai (3) lawm ai lam KHRW kawn tsun da ai re.

Hpakant ginra gaw shinggyim ahkaw ahkang tawt lai ai lam byin law dik rai nna Myen hpyen dap a majaw asak si sum ai mung masha marai 17, mying n lu shagrin ai lak nak lang hpung ni a majaw asak si sum ai marai 3 nga nna Lak nak kaba hkra hkala ai marai (6) daram nga ai lam mung tang madun da ai.

June praw 3 ya shani hta Myen hpyen dap gap dat ai lak nak kaba a majaw Company kaw na Yam bang da ai shara kapaw nna Company magam gun marai 2 asak si sum ai lam chye lu ai. June praw 6 ya shani hta mung Myen hpyen dap kawn masing nga nga hte gap dat ai lak nak kaba a majaw ma kaji marai (4) hte rai yang mung masha marai (9) asak si sum nna dum nta hten za ai lam nga sai re.

Hpakant ginra hta May shata htum maga kaw nna Myen hpyen dap hpung ni du shang wa ai hpang Myen hpyen dap hpung ni gaw mung masha lai wa lai sa lam dingyang shara la nna Mung masha hpe hpyen ninggang shatai nga ai re.

 UN hte ASEAN Mungkan mungdan wuhpung wuhpawng ni hku nna mung myen hpyen dap a shinggyim ahkaw ahkang tawt lai ai lam ni hpe Pat shingdang ahkyak la ai lam lawan galaw ra ai lam Myen hpyen dap a ahkaw ahakng zing madu ai hpe n ra sharawng ai wuhpung wuhpawng ni tsun nga ma ai re.

Shiga- Zau