Hpakant Ginra Hta Kadai Galaw Ai Re N Chye Lu Ai Sinat Gap Sat Hkrum Ai Lam Byin Law Nga

Pajau Media

July 11, 2025

Ya aten gasat gala masa laja hkat nga ai Hpakant ginra hta n dai laman kadai galaw ai re n chye lu ai sinat gap sat hkrum ai manghkang byin law nga ai re hte July praw (1) kaw na (10) ya laman sinat gap sat hkrum ai Moi mang (3) daram nga wa sai lam chye lu ai.

Hpakant ginra de Myen Hpyen Dap htu shadut gasat gala majan hpang wa ai kaw nna lam ntsa hkan mung masha sinat gap da ai ningma hte asak si sum ai lam law wa ai re. Gap sat hkrum ai ni law malawng gaw asak (30) jan kaw nna (45) wa ngan daw ni law nga ai lam mung chye lu ai.

Hpakant ginra hta lak nak lang hpung lahkawng shamu shamwat nga ai ginra re majaw ya na zawn mung masha ni gap sat hkrum ai mabyin n pawt hpe n chye lu ai sha n-ga kadai ni galaw ai re ngu hpe mung n lu sagawn ai re.

Ginra shi sawk ni tang madun da ai hta Hpakant Lawng Hkang Mawsi Zar mare Sky Hotel shawng kaw mung July (10) ya shani Hkying (1) aten daram hta asak (45) ning re ai la wa ngan langai baw kaw sinat gap da ai ningma hte asak si sum ai moi mang hpe mu lu ai lam, dai la wa gaw mare kata nam si gayau dut wa rai nna kadai ni kawn hpa majaw gap sat ai ngu hpe n chye lu ai lam tsun ai re.

Hpakant ginra mung masa shuk shanut wa ai hpang kaw nna mung masha hkawm sa hkawm wa galaw nga ai lam ntsa hkan sinat gap sat manghkang ni jahkring hkring byin law wa ai re hpe mung chye lu ai.

July praw kaw nna 10 ya laman sinat gap ai majaw asak si sum ai marai (3) nga sai sha n-ga ginra shiga dap ni hkan tang madun da ai hta Hpakant ginra kata June shata laman zing ri sat hkrum ai masha marai (6), lam makau hkan sinat gap sat hkrum ai masha marai (11) hte Hka Nawng, U Ru Hka hkan na mu hta la ai moi mang (2) hpe mu lu ai lam tang madun da ai.

Hpakant ginra kata Myen Hpyen Dap htu shadut htim gasat ai lam dingyang galaw nga ai hta lak nak kaba drone ni hkrup mara gap bun ai majaw grai sadi maja ra taw ai masa re hpe mung chye lu ai.

Shiga- Pyilan U