Hpakant Ginra Hta KIA Hte Myen Hpyen Dap Lapran Gasat Gala Majan Laja Lana Byin Nga

Pajau Media

June 17.2025

Hpakant ginra hta June 17 ya shani ka-ang aten du hkra KIA hte Myen hpyen dap lapran gasat gala majan laja nga ai re lam chye lu ai.

June 16 ya shana daw hkying 4 :20 PM aten daram kaw nna Hpakant Maw Wan Kaba hte Maw Wan Kaji lapran kaw Myen hpyen dap P.T.Ts pawng hpawm hpung ni hte KIA pawng hpawm hpung ni lapran gasat gala majan byin ai re lam chye lu ai.

Gasat gala majan laja ai majaw ginra kata nga ai Mung masha law malawng gaw shimlum ai shara de htawt sit koi yen nga ra ai re hte n kau mare kahtawng hkan gaw chyat rawng nga ai mung masha ni mung nga ai re hpe mung chye lu ai.

dai sha n-ga Lawng Hkang hte Maw Si Zar mare kaw mung Jahpawt 9:00 AM aten daram kaw nna Lak nak kaba gap bang ai lam ni dingyang nga taw ai rai nna lak nak kaba kapaw ai nsen ni matut manoi na nga ai raitim mung masha kade hkala ai ngu ai hpe tup hkrak n chye lu shi ai re.

Myen hpyen dap pawng hpawm hpung ni gaw Hpakant Tat Ma Kung kaw nna gasat gala byin ai shara de lak nak kaji kaba gap bang nga ai re hte mung masha ni gaw Maw Si Zar, Kade Maw hte Tar Yar Kung hkawm sa lam hkan Myen hpyen dap shamu shamawt nga ai re majaw grai sadi nna hkawm sa ra ai re lam chye lu ai.

Ya aten Hpakant ginra hta Myen hpyen dap hpung gaw hpyen n-gun jat shamu shamu shamawt ai lam matut manoi galaw nga ai majaw KIA hte gasat gala majan jahkring hkring byin nna Mung masha ni si hkala ai lam shani shagu nga taw ai re lam chye lu ai.

 Shiga -Htu Seng