Hpakant Ginra Hta Laknak Kaba Gap ai lam a majaw Bawm Kapaw Manghkang ni jahkring hkring byin nga ai lam

Pajau Media

July 14, 2025

Jinghpaw Mung Hpakant Ginra kata n dai laman Mung masha nga ai Lawk ni hkan lak nak kaba gap ai lam, Bawm Kapaw Manghkang ni jahkring hkring byin ai re hpe chye lu ai.

July 12 ya jahpawt hkying 1 aten daram hta Lawng Hkang lawk 2 Diamond Seng makau kaw Bawm Kapaw wa ai majaw makau kaw na n ta langai kaw wa hkra nna arung arai hten za ai lam nga ai raitim masha hkra ai lam gaw n nga ai re hpe chye lu ai.

"Laknak kaba wa hkrat ai gaw n re Bawm Wa hkam da ai kun, n re yang Bawm Wa kabai ai kun gaw re, Bawm kapaw ai n ta gaw Numgaw malawng mat ai, n hpan makau kaw na Hka Chyup jak, Hka Pipe ni sha hten mat ai, Karai Kasang garum na masha hpa n byin ai re" nga nna Lawng Hkang ginra masha tsun ai.

Dai shana hkying 11 aten daram hta mung laknak kaba gap shadam ai majaw Mung masha shanu nga ai Lawk de wa hkrat ai lam, Hpakant Muklum kata Laknak kaba n sen ni hte ngoi gara mat ai re lam mung chye lu ai.

"Seng Tawng kaw mung Laknak Kaba n sen ni grai na ai, Yuma maga na manang langai tsun ai gaw Bawm a yai mat ai hkyep ni gaw N ta Numgaw Hkan she wa hkrat ai, grai n- gun kaba ai rai nga ai" nga nna tsun dan ai re.

Myen Hpyen Dap gaw July 13 ya shana daw hkying 5 aten daram hta mung nbungli bawm 5 lang daram wa jahkrat kau da ai majaw Maw Mau Bum hpaji jawng hten za mat ai lam nga ai.

Jawng pat ai n htoi re majaw masha hkra hkala si sum ai lam n nga ai lam, nbungli bawm wa jahkrat ai gaw 5, 6 lang ram re, Maw Mau Bum kaw na Hpaji Jawng numgaw malawng mat ai, kaga hkala ai lam gaw n na sai, Jawng n lung ai n htoi re na tsamai sai, Jawng lung n htoi she rai yang gaw n gwi Myit ai " nga nna ginra masha tsun ai re.

Dai sha N -ga shana hkying 7 aten daram hta mung Myen Hpyen Sap hpung ni gaw Maw Wan nawku jawng kata de shang nna Hpung Up Hpung Sara ni hpe san Jep ai lam ni galaw ai re hpe mung chye lu ai.

Lai wa sai May shata daram kaw nna Hpakant ginra de Myen Hpyen dap htu shadut wa ai kaw nna Mung masha ni nga ai Lawk hkan Laknak Kaba gap bang ai lam, masha asak si sum ai lam ni, masha mat ai manghkang ni jahkring hkring byin nga ai re hpe mung chye lu ai.

Shiga. ND