Hpakant Ginra Hta Lani Hte Lani Gasat Gala Majan Laja Wa Ai Majaw Ginra Masha Law Malawng Koi Yen Nga Ai Lam

Pajau Media

September 16, 2025

Hpakant ginra hta gasat gala majan laja nga ai re hte myen hpyen dap hpyen n-gun kaba htu shadut dingyang re majaw ginra masha law malawng koi yen wa ai re lam chye lu ai.

Hpakant ginra kata gasat gala majan gaw shani shagu byin nga ai hta grau laja wa ai majaw Hpakant ginra masha ni Myitkyina maga de koi yen wa ai re. September 16 ya jahpawt daw hta Mashi Kahtawng mare kaw na Mung masha ni Myitkyina de koi yen hpang wa sai re lam chye lu ai.

Setember 15 ya shana hkying 8 aten daram hta mung Hpakant Sharaw Hka makau grup yin kata KIA hte myen hpyen dap lapran gasat gala majan byin nna hpakant tatma kawng kaw nna laknak kaba gap shadam ai lam nga ai re.

Myen hpyen dap gaw Hpakant ginra hpe madu lu hkra lam amyu myu hku nna htu shadut htim gasat nga ai sha n-ga September 16 ya shani Hpakant de hpyen garum mawdaw 5 lung wa ai re. ya aten Namya mare kaw du nga ai re lam chye lu ai.

Dai zawn sha Manmaw ginra hte Waimaw ginra maga de mung hpyen n-gun htu shadut jat bang nga ai majaw lahkawng maga ang katut gasat gala matut manoi byin nga ai rai nna Nbungli bawm, Drone, Laknak kaba gap bang ai lam matut byin nga ai re hpe mung chye lu ai.

Shiga - Htu Seng